GADTB Güney Azərbaycan Demokratik Türk Birliyi
GADTB: Ərdəbil vilayətinin Təhsil İdarəsində çalışan müəllim Müctəba Əmiri “seçim şərtlərinə uyğun gəlmədiyi” əsas gətirilərək vəzifəsindən uzaqlaşdırılıb. Bildirilir ki, o, bundan əvvəl sosial şəbəkələrdəki fəaliyyətinə görə Təhsil Nazirliyinin Seçim Komissiyasının qərarı ilə müəllimlik fəaliyyətindən müvəqqəti kənarlaşdırılmışdı.
Məlumata görə, Əmiri ötən il Instagram sosial şəbəkəsində paylaşdığı yazılara görə dərs deməkdən uzaqlaşdırılmışdı. Təxminən bir il sonra Təhsil Nazirliyinin Seçim Komissiyası onun ümumi səlahiyyətlərini təsdiqləməyib.
Bu qərar nəticəsində Müctəba Əmiri ilə əmək müqaviləsinə xitam verilib və o, Təhsil Nazirliyi sistemindən işdən çıxarılıb. Onun qərardan verdiyi etiraz da sonrakı inzibati mərhələlərdə təmin edilməyib.
Məlumata əsasən, müəllimə rəsmi şəkildə təqdim olunan sənəddə işdən çıxarılmasının səbəbi “seçim şərtlərinə uyğunluğun təsdiqlənməməsi” kimi göstərilib.
Qeyd edək ki, Müctəba Əmiri Ərdəbil vilayətinin Təhsil İdarəsində müqaviləli müəllim kimi fəaliyyət göstərirdi.
