ادتاج اتحادیه دمکراتیک ترک آذربایجان جنوبی
گادتب: خبرلره گؤره اوچ گوندور مئشکین‌لی حوقوقچو مهری خانیم جعفری تیان‌شان قرقیزستان داغلاریندا ایتیب و بو ساعاتا قدر آختارمالار سونوجسوز قالیبدیر.
مهری خانیم اوشاق، قادین و اقلیت‌لر حاقلاریندان مودافیعه ائدن حوقوقچو اولماقدان علاوه شاعیر و آدلیم داغچیدیر. داها اؤنجه‌لر دونیانین بیر چوخ یئددی‌مین مئتیرلیک داغلاری او قارتالین قانادلارینا تسلیم اولوب اونون آیاقلاری آلتینا سریلمیشدی. او یئددی‌مین مئتیردن یوکسک داغلارا چیخان ایلک آذربایجانلی قادیندیر و خان‌تنگری داغلارینا چیخاندان بری، تیان‌شان داغلارینا چیخماغی دا اؤزونه سؤز وئرمیشدی و ایندی او داغین نم هانسی بوجاغیندا گؤزلردن ایتیبدیر.
دقیق آلتی ایل اؤنجه، بئله بیر گونلرده مهری جعفری فارسی بی‌بی‌سی‌نین پرگار برنامه‌سینین «جوکهای قومی» آدلی بؤلومونده حاضیر اولوب محمود فرجامی کیمی بیشعورلاری گوله گوله یئره سوخدو. بو سئویملی اینسانین تاپیلیب ساغ سالامات دؤنمه‌سینی آرزو ائدیریک.
