GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, İran rejiminin Qaradağ mədənlərini talamsı və ətraf mühiti çirkləndirməsi əhalinin ciddi narazılığına səbəb olur. Bu məsələ o qədər kəskin hal almışdır ki, artıq rejimin təyin etdiyi məmurlar da etiraza etməyə məcbur qalırlar.
Güney Azərbaycan Əhər şəhərinin icra hakimi Əbülfəz Qənizadə bölgə mədənlərinin talanmasına və mədəni işlədənlərin öz öhdəliklərinə əməl etməmələrinə etiraz edib.
Qənizadə etiraf edərək bildirib ki, bu mədənlərin istismarı yerli əhaliyə heç bir xeyir vermir.
Əbülfəz Qənizadə deyib ki, mədən istismarçıları bölgədə infrastrukturun yaxşılaşdırılması ilə bağlı verdikləri vədlərə əməl etmir və bu səbəbdən əhərlilərdə onlara qarşı inamsızlıq yaranıb.
Qənizadə həmçinin deyib: “Mədənlərə məxsus ağır texnikaların yolları dağıtması iki qat problem yaradıb və əldə edilən gəlirlərdən yolların təmiri və bərpası üçün heç bir vəsait ayrılmır”.
Qeyd edək ki, Güney Azərbaycanın Əhər bölgəsində yerləşən Anqut Mis Mədəni və qızıl mədənləri yerli olmayan şirkətlər tərəfindən istismar edilir və Güney Azərbaycanın başqa mədənləri kimi çıxarılan xam mal fars bölgələri, o cümlədən Kirmana daşınır. Bir sözlə İran rejimi müstəmləkəçi kimi Güney Azərbaycanı talayır.
