ABŞ-ın dəniz blokadası İranın neft ixracını demək olar ki, dayandırıb

GADTB: Reuters xəbər verir ki, İran ilk dəfə olaraq təxminən yeddi həftədir Hörmüz boğazından əhəmiyyətli həcmdə xam neft ixrac edə bilmir. ABŞ-ın dəniz blokadası İranın əsas valyuta gəliri mənbələrindən birini ciddi şəkildə məhdudlaşdırıb.

Kpler, Vortexa və TankerTrackers məlumatlarına əsasən, ABŞ-ın iyulun 14-də blokadanı yenidən tətbiq etməsindən bu yana İrana məxsus heç bir xam neft yükü Hörmüz boğazından keçərək İranın qalan əsas neft müştərisi olan Çinə çata bilməyib.

Kpler və Vortexa-nın hesablamalarına görə, İran avqust ayında gündə təxminən 220–255 min barel xam neft və kondensat yükləyib. Halbuki mart ayında bu göstərici gündə təxminən 2 milyon barel təşkil edirdi.

TankerTrackers şirkətinin həmtəsisçisi Samir Mədəni bildirib ki, hazırda İranın 36 milyon 110 min barel xam neft daşıyan 29 neft tankeri Hörmüz boğazının daxilində qalıb.