ABŞ və İsrail İran hakimiyyətinin devrilməsi variantlarını müzakirə edir

GADTB: İsrael Hayom qəzeti yazıb ki, ABŞ, İsrail və bölgənin bəzi ölkələri İrana qarşı mümkün addımları, həmçinin İran hakimiyyətinin devrilməsi və bunun üçün zəruri şəraitin yaradılması variantlarını müzakirə edirlər. Qəzetin məlumatına görə, bu proses uzunmüddətli olsa belə, əsas nəticələrdən biri İrana qarşı iqtisadi mühasirənin mümkün qədər tez bərpa edilməsinin zəruriliyidir.

İsrael Hayom həmçinin bildirib ki, Qərb diplomatik mənbələri ABŞ ilə əldə olunmuş anlaşmanın irəlilədilməsində rol oynayan İran rəsmilərinə, o cümlədən Məsud Pezeşkian və Abbas Əraqçiyə qarşı təzyiqlərin və mümkün hücum cəhdlərinin artmasından narahat olduqlarını ifadə ediblər.

Qəzetin yazdığına görə, həmin mənbələr Əli Xameneinin dəfn mərasimi zamanı Pezeşkian və Əraqçiyə qarşı yönəlmiş addımların İran İnqilab Keşikçiləri Korpusunun onlara münasibətdə əvvəlki təmkinini itirdiyini göstərdiyini iddia edirlər.

İsrael Hayomun İranın daxili proseslərindən məlumatlı kimi təqdim etdiyi mənbələrdən biri bildirib ki, ABŞ ilə anlaşma imzalandıqdan sonra ölkə daxilində fikir ayrılıqları daha da dərinləşib. Onun sözlərinə görə, İnqilab Keşikçiləri Korpusunun komandirləri mülki rəhbərlik üzərində nəzarəti ələ almağa və Məsud Pezeşkian hökumətini kənarlaşdırmağa cəhd göstərə bilərlər.