Azərbaycanlı fəallar Milad Hacılu və Məhəmməd Əbazəri Xoy zindanına köçürülüblər

GADTB-nin Mətbuat Mərkəzinin Xoydan 50 Milyon-a istinadən yaydığı məlumata görə, azərbaycanlı milli-mədəni fəallar Milad Hacılu və Məhəmməd Əbazəri 9 gün Xoyda irqçi fars rejiminin Təhlükəsizlik İdarəsində qaldıqdan sonra 2018-ci il yanvar ayının 17-də Xoy zindanının müvəqqət bölməsinə köçürülüblər.

Qeyd edək ki, azərbaycanlı milli-mədəni fəallar Milad Hacılu və Məhəmməd Əbazəri Güney Azərbaycanın Xoy şəhərindəndirlər. Onlar yanvar ayının 9-da naməlum səbəblərə görə İran rejiminin təhlükəsizlik orqanları tərəfindən yaxalanmışdılar.

Fəalların yaxınlarının dediyinə görə, onların həbsinin Xoy şəhərində son etiraz aksiyası ilə bağlı olması ehtimal edilir.