GADTB Güney Azərbaycan Demokratik Türk Birliyi
GADTB: Sosial şəbəkələrdə yayılan görüntü və məlumatlara əsasən, axşam saatlarında – 10 dey 1404-cü il tarixində – Cənubi Azərbaycanın bir sıra şəhərlərində, o cümlədən Əsədabad, Həmədan, Ərak, Dorud, Nəhavənd və digər bölgələrdə etiraz aksiyaları davam edib. Əsədabad və Həmədan şəhərlərində etirazçılarla molla rejimin qüvvələri arasında toqquşmalar baş verib.
Məlumatlara görə, aksiyalar zamanı birbaşa və üzbəüz qarşıdurmalar müşahidə olunub. Xəbərin hazırlandığı vaxta qədər saxlanılanların sayı barədə dəqiq məlumat açıqlanmayıb, həmçinin mümkün xəsarət alanların vəziyyəti rəsmi qurumlar tərəfindən nə təsdiqlənib, nə də təkzib edilib.
Bildirilir ki, Əsədabadda molla rejimin qüvvələri etirazçıları dağıtmaq üçün birbaşa atəşdən və gözyaşardıcı qazdan istifadə ediblər. Ölən və ya yaralananların sayı ilə bağlı hələlik dəqiq məlumat yoxdur.
Həmədan şəhərində etirazçılar İran İslam Respublikasının bayrağını endiriblər. Bu addım şəhərdə hakimiyyətə və repressiya simvollarına qarşı etirazın bir hissəsi kimi qiymətləndirilir.
Yayılan məlumatlara əsasən, Həmədan vilayətinin Əsədabad şəhərindən olan türk fəal Həmzə İmani 10 dey 1404-cü il tarixində axşam saatlarında etirazlar zamanı hökumət qüvvələri tərəfindən saxlanılıb. Onun harada saxlanıldığı və vəziyyəti barədə hələlik məlumat yoxdur.
Həmədanda gənclərin molla rejimin qüvvələrinə məxsus su şırnaqlı maşınların qarşısında dayanaraq müqavimət göstərdiyi bildirilir. Şəhərdə gərgin vəziyyətin davam etdiyi qeyd olunur.
Ərak şəhərində də etirazçılar küçələrə çıxaraq hakimiyyət əleyhinə “Diktatora ölüm” şüarları səsləndiriblər. Molla rejimin qüvvələri aksiyanı dağıtmaq üçün su şırnaqlı avtomobillərdən istifadə etsə də, etirazçıların müqavimət göstərdiyi bildirilir. Məlumatlara görə, çoxsaylı Ərak sakini küçələrdə toplaşaraq xüsusi təyinatlı qüvvələrə doğru irəliləyib.
Luristan vilayətinin türk və azərbaycanlıların yaşadığı şəhərlərindən olan Dorudda da etiraz aksiyaları davam edib. Bildirilir ki, Dorud rayonunda etirazçılar valilik binasını mühasirəyə alıblar.
