GADTB Güney Azərbaycan Demokratik Türk Birliyi
GADTB: Dünya Bankı hazırda davam edən İran müharibəsinin qlobal iqtisadi artımı COVID-19 pandemiyasından bəri ən aşağı səviyyəyə endirə biləcəyi barədə xəbərdarlıq edib.
İyunun 21-də yayımlanan hesabatda bildirilir ki, münaqişənin yenidən genişlənəcəyi təqdirdə dünya iqtisadiyyatının artım tempi daha da zəifləyə bilər.
Hesabata əsasən, cari ildə qlobal iqtisadi artımın 2,5 faiz olacağı proqnozlaşdırılır. Bu göstərici 2025-ci il üçün nəzərdə tutulan 2,9 faizlik artımla müqayisədə azalma deməkdir.
Dünya Bankı vurğulayıb ki, hərbi qarşıdurmaların yenidən şiddətlənməsi və ya əsas xammal məhsullarının tədarükündə uzunmüddətli fasilələrin yaranması onların qiymətlərini daha da artıra, inflyasiya və ərzaq təhlükəsizliyi problemlərini dərinləşdirə, maliyyə bazarlarında gərginlik yarada və iqtisadi artımı zəiflədə bilər.
Qurum əlavə edib ki, enerji təchizatında yaranacaq problemlər gözləniləndən daha ciddi olarsa və bu vəziyyət maliyyə bazarlarında əhəmiyyətli təzyiqlərlə müşayiət olunarsa, 2026-cı ildə qlobal iqtisadi artım cəmi 1,3 faizə qədər enə bilər.
Məlumata görə, İranla bağlı müharibə səbəbindən Hörmüz boğazının bağlı qalması dünyanın müxtəlif bölgələrində neft, qaz və kimyəvi gübrələrin qiymətlərinin artmasına səbəb olub.
Dünya Bankı həmçinin qeyd edib ki, İran müharibəsinin təsirləri nəticəsində bütün inkişaf etməkdə olan ölkələrdə iqtisadi artımın 2025-ci illə müqayisədə daha zəif olacağı gözlənilir.
Hesabatda bildirilir ki, Çin və Hindistan istisna olmaqla, inkişaf etməkdə olan ölkələrdə adambaşına düşən gəlirin pandemiyadan əvvəlki səviyyəyə çatması, ehtimal ki, 2028-ci ildən sonraya qədər uzanacaq.
