ادتاج اتحادیه دمکراتیک ترک آذربایجان جنوبی
گادتب: کووید ۱۹=کورونا ویروس اؤلکه نی بورویوبدور. هر یاندا ویروس آمان وئرمه دن انسانلاری بیچیر، خزل کیمی سوووُروُر. خسته خانالاردا کوروناویروسا یولوخموش خسته لره بوش یاتاق چارپاییسی تاپیلمیر. مزارلیقلار، حیاتینی ایتیرمیش انسانلارین جنازه لری ایله دولوبدور. بعضی شهرلرده یئنی مزارلیقلار حاضرلاییرلار. هله بو شهرلرین عمومی دورموندا، آزدان- چوخدان داوا- درمان الده ائدیله بیلن بیر شرایط ده دیر. هامی بیلیر وضعیت زیندانلاردا داها شدتلی دیر. تبریز، تهران، اورمیه، کرج، اردبیل و… سایر زیندانلاریندان گلن خبرلر ده بونو تصدیق ائدیر. اردبیل زیندانیندا آذربایجانین ملی– مدنی تورک فعاللاری، اوجمله دن تانیمیش ملی-مدنی مبارز عباس لسانی، یوسف کاری و… کوروناویروسا یولوخوب، برک خسته لنمیشدیلر. لازمی قدر ده داوا- درمان الده یوخدور. زیندان مسئوللاری دئییبلر:
«لازمی قدر وسایط یوخوموزدور»
بو نئجه بیر داورانیش دیر؟ بیر یاندان لازمی قدر مسئولیتلرینه عمل ائتمیرلر؛ داوا-درمان و معالجه امکانینی حاضرلاماییرلار؛ باشقا یاندان دا دوستاقلاردا جانلاری شدتله خطرده اولان محبوسلارا مرخصلیک وئرمیرلر کی، ائولرینه قاییتسینلار و عاییله لرینین گؤزو اوستلرینده اولسون.بیلمه لیدیرلر بو زیندانیلر آذربایجانین «قارچیچکلری» دیرلر!
خسته یه، اؤزللیک کوروناویروس خسته سینه گره ک یئتیشیب –باخان اولا. وقتی وقتینده داوا- درمانلارین حاضرلایا؛ یئمک – ایچمه لریینه باخا و بو دا زیندانلاردا خصوصیله اردبیل زیندانیندا اصلن یوخدور.
زیندانلاردا اسیر اولان آذربایجانلی ملی- معدنی فعاللار، آذربایجان تورک ملتی نین عزیز امانتی، «قارچیچکلری»-دیرلر! ایران حکومتی نین وظیفه سی دیر بو عزیز امانتلرین امنیت و ساغلاملیقلارینی قوروسون! قورویا بیلمیرسه قوندارما اتهاملارلا زیندانا سالدیغی خلق ایگیتلرینی آزاد بوراخسین ! یعنی آزاد بوراخمالیدیر…
بو یازی بیر تظلم سسی دیر. تظلمون بیر باشی عدالت طلب ائدیرسه، بیر باشی دا آییقلیق وئریر، اخطار ائدیر!
بو کورونالی دورومدا حق سیز یئره زیندانا سالینمیش آذربایجانین عدالت سئوه ر تورک ملی-مدنی فعاللاری عباس لسانی، لطیف حسنی، یوسف کاری، علیرضا فرشی و… تئزلیک له آزاد بوراخیلمالدیر!
آنا دیلی – عدالت – آزادلیق
