گادتب: ایرانین غربی سینیرلاریندا خانا و بانا آدلی ایکی شهر واردیر. خانانین آدی اللی ایل اؤنجهدن رسمی مرجعلرده پیرانشهره چئوریلیب و بانا شهری هله ده بانه آدلانیر. کسینلیکله بو ایکی شهرین آدلاری بیربیریله ایلگیلیدیر و بیزجه منطقهنین تاریخی کئچمیشینه سؤیکهنرک او آدلاری تورک دیلی چرچیوهسینده آراشدیرماق مقصده اویغون بیر توتومدور.
خانانین قدیم فورماسی قانادیر و قانا تورک دیلینده آرخ، چایلاق و دره آنلامیندادیر. هله ده بیر چوخ شهرلریمیزده مؤولوکده مؤو آغاجلاری اوچون دوزلمیش درین آرخالارا قانا دئییلیر و بو لوغتله ایلگیلی بعضی شهرلرده «قانابره» کیمی کند آدینا دا توش گلیریک. بو آدلار بعضن فارس سیستمی طرفینده تحریف ائدیلهرک «خانه برق» یازیلیبدیر. بیلدیگنیز کیمی بره لوغتی همن وریان، سو کئچیدی و سو بندیدیرکی بختیار واهابزادهنین مشهور گولستان پوئماسیندا «آچین برهلری، آچین یوللاری» میصراعسی اونون شاهیدیدیر و خانا و بره لوغتلرینین یاناشی ایشلنمهسی تمامیله اویغوندور.
خانا شهری اقلیم باخیمندان، بؤیوک بیر چایلاقدیرکی ایران سینیرلاریندان سردشت شهرینه طرف (یانی شمالِ غربدن، جنوبِ شرقه طرف) چکیلیبدیر. بئلهلیکله بو شهرین خانا آدلانماسی هئچ ده تصادوفی دئییل و اونون طبیعی منظرهسی ایله ایلگیلیدیر.
آما بانا ایکی درهنین اورتاسینداکی اوجالیق یا ایکی آرخ آراسینداکی تورپاق ییغیمدیر. مؤولوکده ایکی مؤو آرخینین اورتاسیندا اوجا و مؤولرین یاتدیغی یئره بانا دئییلیر. بو لوغت ده، بانا شهرینین طبیعی اقلیمی ایله اوست اوسته دوشور، بانا اطراف درهلردن و چایلاقلاردان فرقلنن بیر اوجالیقدیر. بو شهر سانکی آرخلار و چایلاقلارین آراسیندا قالانمیش تورپاق ییغیمیدیر.
بیز بو ایکی لوغته آذربایجان ادبیاتیندا دفهلرله توش گلیریک، شبسترلی معجز مشهور «اوغول و آنا» شئعرینده عاغیللی آنا دیلیله اوشاغا بئله نصیحت وئریر:
یا گرک حاجی، بئله داش ییغا باغدا قانادا
یا کی بیر بئل گؤتورب ایشلهیه آرخدا، بانادا
اوغلونو چوخ اوخودار معرفت اولسا آنادا.
معجز باشقا بیر شئعرده ده، بانا لوغتینی ایشلهدیبدیر:
بئش- آلتی فعله توتموشام دوزلدیب آرخ- بانهسین
و هر بیری ایکی قیران، آلیب آچیب کمانهسین.