Güney Azərbaycanda Qəzvin Tibb Elmləri Universitetinin əməkdaşları etiraz aksiyası keçirdilər

GADTB: Qəzvin Tibb Elmləri Universitetinin bir qrup əməkdaşı 30 xordad tarixində universitetin ərazisində etiraz aksiyası keçirərək əmək və sosial problemlərinə diqqət çəkiblər.

Məlumata görə, aksiya iştirakçıları əməkhaqlarının və sosial təminatların aşağı səviyyədə olmasına baxmayaraq, cümə axşamı günlərinin iş günü olaraq saxlanılmasına etiraz ediblər.

Etirazçılar bildiriblər ki, əmək şəraiti, maaş və əlavə ödənişlər onların gözləntilərinə uyğun deyil. Onlar iş yükünün çoxluğu ilə əməkhaqqı və sosial təminatlar arasında balansın olmadığını vurğulayıblar.

Aksiya zamanı iştirakçılar əmək və məişət şəraitinin yaxşılaşdırılması, maaş və sosial təminatların artırılması, həmçinin iş rejiminə yenidən baxılması tələblərini səsləndiriblər.

Hazırda universitet rəhbərliyi və ya aidiyyəti qurumlar tərəfindən etirazla bağlı rəsmi açıqlama verilməyib.