GADTB Güney Azərbaycan Demokratik Türk Birliyi
GADTB: “Wall Street Journal” qəzetinin jurnalisti Aleks Vardın məlumatına görə, ABŞ Konqresində ən azı üç respublikaçı qanunverici – o cümlədən Nümayəndələr Palatası və Senatın Silahlı Qüvvələr komitələrinin sədrləri – dolayı şəkildə İran İslam Respublikasına qarşı mümkün quru əməliyyatının planlaşdırılması barədə danışıb. Jurnalistin sözlərinə görə, belə bir əməliyyat yaxın gələcəkdə başlaya bilər.
Bu məlumat bölgədə gərginliyin artdığı və ABŞ-ın daha genişmiqyaslı münaqişəyə birbaşa qoşulması ehtimalı ilə bağlı müzakirələrin gücləndiyi bir vaxtda yayılıb.
Bununla belə, ABŞ Konqresi və ya bu ölkənin Müdafiə Nazirliyi tərəfindən hələlik bu iddiaları təsdiqləyən rəsmi açıqlama verilməyib və məsələ hazırda yalnız media məlumatları və siyasi təhlillər səviyyəsində qalır.
Digər tərəfdən, CNN telekanalı məlumatlı mənbələrə istinadən bildirib ki, İran İnqilab Keşikçiləri Korpusu (Sepah) Körfəzdə yerləşən Xark adası ətrafında mina yerləşdirməyə başlayıb və ABŞ tərəfindən mümkün quru hücumuna qarşı hazırlıq görür.
Məlumata görə, bu addımlar strateji əhəmiyyətli bölgələrdə müdafiə hazırlıqlarının artırılması çərçivəsində qiymətləndirilir. Mənbələr bu tədbirlərin vaxtı və miqyası barədə əlavə məlumat verməyib.
Hazırda nə İran, nə də ABŞ rəsmiləri bu iddialara münasibət bildirib və məlumatların doğruluğu müstəqil şəkildə təsdiqlənməyib.
