İsrailin müdafiə nazirindən İrana sərt xəbərdarlıq: “İsrailə hücum etsəniz, İran alovlar içində yanacaq”

GADTB: İsrailin müdafiə naziri İsrael Kats oktyabrın 21-də, çərşənbə günü, İran İslam Respublikası və onun proksi qüvvələrinin İsraildə keçiriləcək seçkilərin nəticələrinə təsir göstərmək məqsədilə hücumlar təşkil etməyə çalışması barədə xəbərdarlıq edib. O bildirib ki, İsrailin təhlükəsizlik qurumları bu cəhdlərin qarşısını almağa hazırdır.

İsrael Kats vurğulayıb ki, İran İslam Respublikası rejiminin hazırkı zəifliyi onu daha ifrat addımlara əl atmağa sövq edə bilər. O xəbərdarlıq edib ki, İsrailə qarşı istənilən hücuma ağır cavab veriləcək və “İran alovlar içində yanacaq”.

İsrailin müdafiə naziri İsrael Kats deyib: “Hörmətli iştirakçılar, son günlər İran İslam Respublikası və onun proksi qüvvələrinin İsraildə seçkilərin nəticələrini pozmaq məqsədi daşıyan hücumları həyata keçirmək üçün cəhdlər göstərdiyinə dair əlamətlər aşkar etmişik.

İran İslam Respublikası rejimi hazırda özünün ən zəif dövrlərindən birini yaşayır. Biz hesab edirik ki, bu zəiflik onu hətta İsrail dövlətinə qarşı da ən ifrat addımları atmağa sövq edə bilər.

İran İslam Respublikası rejiminə mesajımız aydındır: sizin cəhdlərinizi aşkar etmişik, onların qarşısını almağa hazırıq və bütün gücümüzlə sizə zərbə endirməyə hazırıq.

Əgər İran İsrailə hücum edərsə, İran alovlar içində yanacaq. Bizə hücum edən hər kəsi təqib edəcəyik. İsrail ordusunun əsgərlərinə və ya İsrail vətəndaşlarına zərər vuran hər kəs bunun ən ağır bədəlini ödəyəcək.

İsrail ordusu və bütün təhlükəsizlik qurumları ilə birlikdə ölkəmizi qorumaq üçün lazım olan hər zaman və hər yerdə fəaliyyətimizi davam etdirəcəyik”.