İsrailli nazir: İran İslam Respublikası ilə razılaşma əldə etmək mümkün deyil

GADTB: İsrailin mədəniyyət və idman naziri Miki Zohar ABŞ administrasiyasının İran İslam Respublikasına münasibətdə tutduğu mövqeni tənqid edərək bildirib ki, Tehranın Vaşinqtona qarşı səsləndirdiyi təhdidlər İranla uzunmüddətli və etibarlı razılaşmanın mümkün olmadığını göstərir.

Miki Zohar sosial şəbəkə platforması X-də paylaşdığı mesajda yazıb ki, İran İslam Respublikasının ABŞ-ı açıq şəkildə təhdid etməsi Prezident Donald Trump üçün də aydın mesaj olmalıdır və bu, onun fikrincə, “terrorçu təşkilatlar və ya terroru dəstəkləyən dövlətlərlə” davamlı razılaşma əldə etməyin mümkünsüzlüyünü göstərir.

İsrailli nazir həmçinin iddia edib ki, İran İslam Respublikası imzaladığı razılaşmalara sadiq qalmayacaq.

Onun sözlərinə görə: “Onlar imzaladıqları heç bir razılaşmaya hörmət etməyəcək və öhdəliklərinə əməl etməyəcəklər.”

Zoharın açıqlaması ABŞ və İran arasında davam edən danışıqlar fonunda səsləndirilib və Vaşinqtonun Tehranla mümkün razılaşma əldə etmək cəhdlərinə İsrail hökumətində mövcud olan narahatlıqların davam etdiyini göstərir.