GADTB Güney Azərbaycan Demokratik Türk Birliyi
GADTB: ABŞ və İsrailin kürd qruplarını birləşdirib silahlandırmaqla Qərbi Azərbaycan bölgəsində bütün hərbi və siyasi bazaları hədəfə aldığı və dağıtdığı bildirilir. Məqsədin kürd qruplarının hücumu üçün yol açmaq olduğu qeyd olunur.
Bildirilir ki, bu addımın əsas hədəfi “fars irqçi rejiminin devrilməsi” kimi təqdim olunsa da, Azərbaycan cəmiyyətinin kürd silahlı qrupları ilə bağlı əvvəlki təcrübəsi və yaddaşı səbəbindən belə bir vəziyyətin Cənubi Azərbaycanda qanlı hadisələrə səbəb ola biləcəyi ilə bağlı narahatlıqlar səsləndirilir. Buna görə də bəzi mənbələr Azərbaycan milli fəallarının tez bir zamanda birlik yaradaraq təşkilatlanmasının və bölgəyə qarşı mümkün planların qarşısını almağa çalışmasının vacibliyini vurğulayır.
Eyni zamanda qeyd olunur ki, Türkiyə və Azərbaycan dövlətləri də vəziyyəti diqqətlə izləməli, Azərbaycanın və ümumilikdə türk dünyasının maraqlarının təhlükə altına düşməməsi üçün tədbirli olmalıdır.
Xarici xəbər agentliklərinin məlumatına görə, altı İran kürd qrupundan ibarət koalisiya yaxın günlərdə İraqdan İrana daxil olacaqlarını elan edib. Bildirilir ki, onlar İranın təhdidlərinə və Türkiyənin artan etirazlarına baxmayaraq, ABŞ və İsrailin rejimi devirməyə yönəlmiş hücumlarına qoşulmaq niyyətindədirlər.
Məlumata görə, Məsud Bərzani artıq bu plana açıq şəkildə qarşı çıxmır və plan çərçivəsində kürd silahlı qruplarının sərhəd bölgələrini nəzarətə götürməsi nəzərdə tutulur.
Həmçinin bildirilir ki, İraq Kürdüstan Muxtariyyətinin rəsmi qüvvələri bu əməliyyatda iştirak etməyəcək. Qrupların İrana Hacımran və Başmaq sərhəd keçidlərindən, yəni Tələbaniyə bağlı qüvvələrin nəzarətində olan ərazilərdən daxil olacağı iddia edilir.
Bəzi məlumatlara görə, ABŞ və İsrail son günlərdə sərhəd bölgələrini intensiv şəkildə bombalayır. Bu addımın məqsədinin İran qüvvələrini geniş bir ərazidə dağıtmaq və zəiflətmək, eyni zamanda digər etnik qrupları – o cümlədən bəluc və Azərbaycan türklərini üsyana təşviq etmək olduğu iddia olunur.
