GADTB Güney Azərbaycan Demokratik Türk Birliyi
GADTB: Regional mediada yayılan məlumatlara görə, terror təşkilatı olan Kürdüstan Fəhlə Partiyasının (PKK) İran qolu hesab edilən terror təşkilatı Kürdüstan Azad Həyat Partiyası (PJAK) İranın şimal-qərb sərhəd bölgələrində fəaliyyətini genişləndirməkdədir. Türkiye Gazetesinin yazdığına görə, bölgədə hərbi gərginliyin artdığı bir vaxtda qruplaşma Qərbi Azərbaycanın bəzi hissələrinə qüvvə köçürür və yeni strukturlar yaratmağa çalışır.
Jurnalist Yılmaz Bilgen tərəfindən qələmə alınan məlumatda bildirilir ki, PJAK-la əlaqəli xeyli sayda silahlı şəxs İraq Kürdüstan Muxtar Bölgəsinin Süleymaniyyə şəhəri ətrafından İran ərazisinə keçirilib. Qeyd olunur ki, Makı, Salmas və Urmiyə istiqamətindəki bəzi dağlıq ərazilər bu qüvvələrin mümkün fəaliyyət və yerləşmə məntəqələri kimi nəzərdən keçirilir.
Təhlükəsizlik üzrə analitiklər hesab edirlər ki, həmin bölgələrin dağlıq coğrafiyası partizan tipli fəaliyyət üçün əlverişli şərait yaradır. Bununla yanaşı, baş verən proseslərin Türkiyə, Azərbaycan və Naxçıvan Muxtar Respublikası arasında sərhəd və kommunikasiya xətlərinin təhlükəsizliyinə mümkün təsiri ilə bağlı narahatlıqlar da səsləndirilir.
Eyni zamanda bəzi təhlükəsizlik mənbələri iddia edir ki, əvvəlki illərdə İranın sərhəd bölgələrində bu qruplaşmanın fəaliyyəti müəyyən hallarda təhlükəsizlik qurumlarının nəzarəti və ya göz yumması şəraitində baş verib.
Məlumatlarda həmçinin qeyd olunur ki, dağlıq ərazilərlə yanaşı, təşkilatın bəzi regional şəhərlərdə şəhər tipli gizli hücrələr yaratmaq ehtimalı da gündəmə gətirilir. Bu isə silah ehtiyatının toplanması və mümkün əməliyyat hazırlıqları ilə bağlı əlavə narahatlıqlar doğurur.
Ekspertlər bildirirlər ki, əgər qruplaşmanın Qərbi Azərbaycanın sərhəd bölgələrində mövcudluğu genişlənərsə, bunun təhlükəsizlik baxımından nəticələri regionun mühüm tranzit marşrutlarına, o cümlədən Türkiyə ilə Azərbaycan arasında planlaşdırılan kommunikasiya layihələrinə təsir göstərə bilər.
