GADTB Güney Azərbaycan Demokratik Türk Birliyi
GADTB: ABŞ Dövlət Departamenti açıqlayıb ki, ABŞ Maliyyə Nazirliyi İran İnqilab Keşikçiləri Korpusunun Qüds Qüvvələri ilə Livandakı Hizbullah arasında nağd pul köçürülməsinə cavabdeh olan maliyyə şəbəkəsinin 10 üzvünə qarşı sanksiya tətbiq edib.
Açıqlamaya görə, bu şəbəkə Livan, Türkiyə, Birləşmiş Ərəb Əmirlikləri və İran arasında kommersiya aviareysləri ilə hərəkət edən kuryerlərdən istifadə etməklə yüz milyonlarla dollar vəsait daşıyıb. Bu fəaliyyət İran rejiminə qanunsuz yollarla xarici valyuta əldə etməyə, sanksiyalardan yayınmağa və Hizbullahı maliyyələşdirməyə imkan verib.
ABŞ Dövlət Departamenti bildirib ki, İran rejimi onilliklər ərzində Hizbullahdan Yaxın Şərqdə terror fəaliyyətini genişləndirmək üçün istifadə edib. ABŞ Maliyyə Nazirliyi də Qüds Qüvvələri ilə Hizbullah arasında nağd pul daşınmasını həyata keçirən maliyyə şəbəkəsinin 10 üzvünü sanksiya siyahısına əlavə edib.
Açıqlamada qeyd olunub ki, şəbəkənin fəaliyyətinin araşdırılması və qarşısının alınması Türkiyənin tərəfdaşları ilə sıx əməkdaşlıq və koordinasiyanın nəticəsidir.
ABŞ tərəfi İranın Hizbullah da daxil olmaqla maliyyə dəstəyi şəbəkələrinə qarşı tədbirləri davam etdirəcəyini bildirib. Vaşinqtonun məlumatına görə, bu şəbəkələr Hizbullahın bölgədə təhlükəsizliyi təhdid etməsinə, Livan dövlətinin suverenliyini zəiflətməsinə və ABŞ-ın regional müttəfiqlərinin təhlükəsizliyini riskə atmasına şərait yaradır.
ABŞ Maliyyə Nazirliyi bu tədbirin terrorizmlə mübarizə səlahiyyətləri çərçivəsində həyata keçirildiyini bildirib. ABŞ 2001-ci ildə Hizbullahı xüsusi təyin olunmuş qlobal terrorçu, 1997-ci ildə isə xarici terror təşkilatı kimi tanıyıb. Qüds Qüvvələri də 2007-ci ildə xüsusi təyin olunmuş qlobal terrorçu, 2019-cu ildə isə xarici terror təşkilatı elan edilib.
