GADTB Güney Azərbaycan Demokratik Türk Birliyi
GADTB: Təbrizdə fəaliyyət göstərən Motojen şirkətinin işçiləri beşinci gündür tətil aksiyasını davam etdirirlər. İşçilərin sözlərinə görə, indiyədək şirkət rəhbərliyi onların tələblərinə heç bir reaksiya verməyib.
İşçilərin əsas tələbi köhnə və yeni müqaviləli əməkdaşların əməkhaqlarının bərabərləşdirilməsidir. Onların bildirdiyinə görə, bu iki qrup arasında maaş fərqi təxminən 10 milyon tümən təşkil edir.
Etirazçılar əməkhaqlarının Traktorqayırma və İDEM kimi digər sənaye müəssisələrində çalışan işçilərlə müqayisədə xeyli aşağı olduğunu da vurğulayıblar. Onların iddiasına əsasən, şirkətin baş direktoru inzibati heyətə və özünə yaxın şəxslərə 50–100 milyon tümən məbləğində mükafatlar versə də, fəhlələr bundan kənarda qalıblar.
Məlumata görə, son beş ay ərzində işçilərin əlavə iş saatları ləğv edilib və bu səbəbdən onların aylıq gəlirləri ötən illə müqayisədə azalıb.
İşçilər həmçinin sosial təminat paketinin olmamasından, digər müəssisələrdən fərqli olaraq səhər yeməyi və naharın verilməməsindən, işdən çıxarılmaqla hədələndiklərindən şikayət ediblər. Onlar şirkətdə qohumbazlıq və himayədarlığın geniş yayıldığını, bəzi şəxslərin faktiki işləmədən əməkhaqqı aldıqlarını iddia ediblər.
