GADTB Güney Azərbaycan Demokratik Türk Birliyi
GADTB: ABŞ Prezidenti Donald Tramp İranla heç bir danışıqların və ya təmasların aparılmadığını, gələcək üçün də hər hansı danışıqların planlaşdırılmadığını bildirib.
Tramp «Truth Social» sosial şəbəkəsində yazdığı paylaşımda İranın dəniz mühasirəsinin «bütün gücü ilə» davam etdiyini bildirib. O, həmçinin Hörmüz boğazının açıq və fəaliyyətdə olduğunu iddia edərək, bölgədəki bütün dəniz minalarının ya toplanıldığını, ya da partladıldığını qeyd edib.
Bu açıqlamalar Tehran hakimiyyətinin çərşənbə axşamı verdiyi bəyanatdan sonra səslənib. İran tərəfi Vaşinqtonun, o cümlədən limanlara tətbiq olunan mühasirənin və neft sanksiyalarının aradan qaldırılması ilə bağlı İranın şərtlərini qəbul etməyənədək Hörmüz boğazının açılmayacağını bildirib.
Beləliklə, Trampın Hörmüz boğazının «açıq olması» ilə bağlı iddiası Tehran hakimiyyətinin rəsmi mövqeyi ilə ziddiyyət təşkil edir.
Trampın son açıqlamaları həmçinin Vaşinqtonla Tehran arasında əldə edilmiş anlaşmada nəzərdə tutulan 60 günlük müddətin başa çatmasından sonra səslənib. Müddət tərəflərin yekun razılaşmaya nail olmaması ilə başa çatıb və hər iki tərəf danışıqların nəticəsiz qalmasına görə bir-birini məsul tutur.
