Babək Nəhreynin Azərbaycan aşıqlarından üzr istədi

GADTB-nin Mətbuat Mərkəzinə daxil olan məlumata görə, aşıqları təhqir edən Babək Nəhreynin Azərbaycan aşıqlarından üzr istəyib.

Bununla bağlı Şərqi Azərbaycanda Mədəniyyət və İrşad İdarəsinin rəisi Qasim Nazimi mediaya açıqlamasında təbrizli komediyaçı Babək Nəhreynin Azərbaycan aşıqlarını aşağılayan proqramı ilə bağlı açıqlama verib.

O bildirib ki, Babək Nəhreynin həmin proqramından sonra mədəniyyətsevər və mədəni fəalların etirazlarını nəzərə alaraq həmin idarədə hər iki tərəfin iştirakı ilə toplantı keçirib.

Nazimi deyib: “Toplantıda Babək Nəhreyn verilişdən məqsədinin aşıqları aşağılamaq olmadığını, bu vasitə ilə Azərbaycan aşıq sənətini daha çox tanıtdırmağa çalışdığını, bunun yanlış anlaşıldığı üçün bütün aşıqlar və azərbaycanlılardan üzr istədi”.

Qeyd edək ki, bir neçə gün öncə Babək Nəhreynin Coker proqramında Azərbaycanın milli mədəniyyətinə, geyiminə, dilinə, tarixinə və əsil musiqisinə qarşı komediya adı altında nalayiq hərəkətlər edib.

Buna görə də Şərqi Azərbaycan “Aşıqlar” Mədəniyyət və İncəsənət Dərnəyinin sədri Məhəmməd İbadi bu məsələyə məhkəmə orqanları vasitəsilə aydınlıq gətirməyə məcbur olduqlarını və komediyaçını məhkəməyə verdiklərini bildirib.