Cümə , Yanvar 28 2022
azfa

Beynəlxalq Türk Akademiyasından Ankaraya Bilgə Tonyukuk abidəsi hədiyyə olunub

GADTB-nin Mətbuat Mərkəzinə daxil olan məlumata görə, Ankara sakinləri artıq Ötükənə getmədən 1300 illik yaşı olan Bilgə Tonyukuk abidəsini ziyarət edə biləcəklər.

Tarixdə türklərə məxsus yazılı qaynaqlarda ilk dəfə “Türk” sözünün rast gəlindiyi Tonyukuk daş kitabəsinin eyni nüsxəsi Beynəlxalq Türk Akademiyası tərəfindən hazırlanıb və sözügedən parkda ucaldılması üçün Türkiyə tərəfinə təqdim edilib.

22 fevral tarixində Türkiyə Böyük Millət Məclisinin Sədri Mustafa Şentop, Türk Akademiyasının prezidenti Darhan Qıdırəli, türk dövlətlərinin Ankaradakı səfirləri, bir sıra nüfuzlu alimlərin, dövlət xadimlərinin iştirakı ilə Altındağ bələdiyyəsində “Türk Dünyası Tonyukuk Parkı”nın və parkda yer alacaq “Tonyukuk abidəsi”nin açılışı olacaq.

Beynəlxalq Türk Akademiyası ilə Ankara şəhərinin Altındağ Bələdiyyəsi UNESCO-nun qərarı ilə ötən il Bilgə Tonyukuk yazılı abidəsinin ucaldılmasının 1300 illiyi münasibətilə “Tonyukuk İli” və bu il Türkiyədə “Türk Dili İli” elan olunmasını nəzərə alaraq belə bir qərara imza atıblar.

Qeyd edək ki, VIII əsrdə Mərkəzi Asiyada Orxon çayı vadisində ucaldılmış Bilgə Tonyukuk kitabəsi türk xalqlarının ən qədim ortaq yazılı qaynaqlarından biri hesab olunur. Qədim türk-runik əlifbası ilə yazılan kitabə türklərin dövlətçilik tarixinə, onların yaşam və həyat tərzinə, digər dövlətlər və xalqlarla münasibətlərinə, müstəqillik uğrunda apardıqları mübarizəyə işıq tutur.

Daş kitabənin yazarı və ya sifarişçisi olan Bilgə Tonyukuk türk tarixçisi və böyük dövlət xadimidir. O, VIII yüzillikdə Göytürk Xaqanlığı dövründə yaşayıb, İltəriş Xaqan, İnel Xaqan, Qapağan Xaqan və Bilgə Xaqanın baş vəziri, həmçinin bir sıra müharibələrdə Göytürk ordusunun komandanı olub.

Həmçinin yoxlayın

İran Ermənistanla qızıl və almaz hasilatı sahələrində əməkdaşlıq edə bilər

GADTB-nin Mətbuat Mərkəzinin “Azad İran”a istinadən yaydığı məlumata görə, İranın Qızıl, Cəvahirat, Gümüş və Qiymətli …

Türkiyənin TOGG avtomobili “CES-in Ən Yaxşı 20 Brendi”ndən biri seçildi

GADTB-nin Mətbuat Mərkəzinə daxil olan məlumata görə, Türkiyənin mobillik sahəsində xidmət göstərən qlobal texnologiya markası …