GADTB Güney Azərbaycan Demokratik Türk Birliyi
GADTB: Tikantəpənin Çəmli gölü İranın siyasi-coğrafi sərhədləri daxilində yerləşən müxtəlif bölgələrdən gəlmiş çoxsaylı türklərin geniş iştirakı ilə izdihamlı mərasimə şahidlik edib. Minlərlə insan bir araya gələrək öz musiqisini, rəqsini, geyimini, mədəniyyətini və yerli adət-ənənələrini nümayiş etdirib.
Xorasan, Fars bölgəsi və Qaşqay elindən, Zəncan və Həmədan şəhərlərindən, Təbriz və Urmiyadan, eləcə də Azərbaycanın digər şəhərlərindən gələn iştirakçılar mərasimə qatılıb və Çəmli gölünün sahilində türk mədəniyyətinin müxtəlifliyini və zənginliyini nümayiş etdiriblər.
Bu toplantı mərasimin başlanmasından etibarən bəzi məhdudiyyətlərin, o cümlədən telefon və internet əlaqəsinin kəsilməsi ilə bağlı məlumatların yayıldığı bir şəraitdə keçirilib. Lakin bu məhdudiyyətlər mərasimin geniş və təntənəli şəkildə keçirilməsinə mane ola bilməyib.
Musiqi, rəqs və yerli adət-ənənələrin nümayiş olunduğu mərasim zamanı “Azərbaycan var olsun – istəməyən kor olsun” şüarının səsləndirilməsi tədbirin ab-havasını dəyişib və bu mədəni bayrama milli kimlik çaları qazandırıb.
Koroğlu festivalının keçirilməsi üçün Tikantəpənin Çəmli gölünün seçilməsi də sadəcə turizm tədbiri çərçivəsindən kənara çıxan məna daşıyıb. Koroğlunun adı, türk musiqisi və mədəniyyəti, eləcə də müxtəlif bölgələrdən minlərlə insanın iştirakı Çəmli gölünü bu coğrafiyada yaşayan türklərin canlı mədəniyyətinin və kollektiv yaddaşının nümayiş etdirildiyi məkana çevirib.
“Çəmlidə Koroğlu harayı” yalnız bir festivalın səsi olmayıb; musiqi, rəqs, geyim, adət-ənənə və dil vasitəsilə özünü nümayiş etdirən bir mədəniyyətin səsi olub. Bu mərasim bir daha göstərib ki, canlı mədəniyyəti inzibati sərhədlər və siyasi məhdudiyyətlər çərçivəsində saxlamaq mümkün deyil.
