GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, İranla Çin arasında müstəmləkəçilik xarakteri daşıyan 25 illik müqavilədən sonra Güney Azərbaycan mədənlərinin Çin tərəfindən qarətinə start verilir.
“Sarabnews” saytının yaydığı məlumata görə Çindən olan bir qrup iş adamı və mütəxəssis Qərbi Azərbaycan vilayətinə səfər etdikdən sonra Şərqi Azərbaycanın Sarab şəhərinə gediblər.
Çinlilərin qarət etmək üçün bölgədə yerləşən yeraltı qaynaqların həcmini öyrənməyə çalışdığı bildirilir.
“Sarabnews” saytı yazıb ki, “Çindən olan və başqa şəhərlərdə də kapital yatıran bir qrup iş adamı, bu bölgədə investisiya imkanlarının dəyərləndirilməsi üçün Urmiyadan olan mütəxəssislərlə birgə bölgəyə səfər ediblər”.
Çinlilərin Sarab bölgəsi, xüsusilə Bozquş dağında yerləşən mədənlərin istismarı ilə bağlı müzakirələr apardığı bildirilir.
Cari il aprelin 6-da Tehranın Sənaye, Ticarət və Mədən Palatasının katibi Şəhram Şəriəti mətbuata verdiyi açıqlamada bildirmişdi ki, Çinlə İran arasında bağlanan müqavilədə mədənlərin, özəlliklə qızıl yataqlarının istismarı barədə razılıq əldə edilib.
Şəhram Şəriəti etiraf etmişdi ki, “çinlilər ölkə mədənlərinin istismarında çoxdan iştirak edirlər. Ancaq qızıl yataqlarının istismarının çinlilərin əlində olması barədə məlumatlardan yalnız dövlət xəbərdardır”.
