ادتاج اتحادیه دمکراتیک ترک آذربایجان جنوبی
گادتب: شرفالدوله (1311-1231 ه. ش.) لقبی ایله کلانتر آدینا مشهور اولان میرزا ابراهیم خان باغمیشهای-نین ائوی و باغی قاجارلار دؤرونه عایددیر. بو ائو تبریزین عباسی خیاوانیندا، هاشمی کوچهسی، پلاک 23، ملی اثرلر لیستهسینده، 1382 قویروقدوغان آیین 27-سینده، 971 نومره ایله ثبت اولونوبدور. لاکین تاسفله، بیر چوخ تایی- بنزهری اولمایان قدیم و تاریخی اثر کیمی قورونماییب، باخیلماییب و ییخیلماقدادیر.
میرزا ابراهیم خان شرفالدّوله باغمیشهای ملی شورا مجلسینین بیرینجی دؤرهسینده، تبریزین ملت وکیلی، و تبریزین اوچونجو بلدیه باشقانی ایدی. او ایکی یول بو مقاما منصوب اولموشدو. کلانتری عایلهسی، تبریزین باغمئشه بؤلگهسینین اربابی و کدخوداسی ایدیلر. اونلاردان بیر چوخ دهیرلی اثر او جملهدن باغمئشهنین کلانتر مسجدی یادیگار قالیبدیر. باغمئشهلی ابراهیم خان شرفالدولهنین باشقا دهیرلی ایشلریندن ده، شرف یا شرفیه مدرسهسینی ایجاد ائتمکدیر. بو مدرسه سونرالار خیام آدلاندیریلدی. ها بئله، باغمئشهده اوغلو مهندس کلانتری ایله فرش کرخاناسی قویموشدو.
بینانین تکنیک اؤزللیکلری
بو بینا، 6550 متر مربعلیک مساحتی اولان باغین ایچیندهدیر (بو، قدیمکی باغین بیر بولومودور). بو بینانین اعیانیسی، ایکی قاتدان اولوشان، 1040 متر مربعدن عبارتدیر کی، قبالهسی ائوین آدینادیر. بینانین معماریسی قافقاز معماریسیندن الهام آلمیش، یئرئل معمار و بنالارین الیله تیکیلمیشدیر.
بو ائوین پلانی تمامیله قرینهدیر، و قاجار دؤرونون باشقا بینالاری کیمی بو ائوین ده تیکیلمهسینده تقارن مکمل شکیلده گؤزلهنیلیبدیر. یئر قاتیندا (طبقه همکف)، بیر ایوان، دؤرد جوت ستون، بیر گیریش آستانا کیمی، بیر دهلیز، ایکی یان اوتاق اوچ قاپیلی اولگوسویله، ال اوتاغی اولاراق، و بو ایکی اوتاغین دالیندا میتباخ اولاراق ایکی آیری اوتاق یئرلشمیشدیر. یئر قاتیندان بیرینجی قاتا گئدن پلهلر دهلیزین دیبیندهدیر. بیرینجی قات دا بیر تنهبی (تنهبی بینانین آنا محورینده یئرلشیر، ایکی قاپی ایله یان ایوانلارا باغلانیلیر)، بیر دهلیز و دؤرد اوتاقدان عیبارتدیر.
سوروملولارین اهمالی و سایمازلیغی نتیجهسینده اؤزباشینا بوراخیلیب تؤرتؤکونتو حالینا گلن بو تاماشالی و نفیس ائو و اونون باغی، تبریزین ایلک کلانترینه عاید ایدی. حالبوکی، بو تاریخی ائو اوناریلیب یئنیدن جانلاندیریلیرسا، «ایکی کمال» پارکینین بیر بؤلومو اولاراق کولتورل اوجاق، توریستی بیر یئر یا دا رستوران حالینا گتیریلیب هم قازانج قایناغی هم ده تاریخ و کیملیگیمیزی قورویان گؤرمهلی بیر یئر اولار.
امید ائدیریک سوروملولار، تبریزین بو قیمتلی تاریخی- کولتورل جواهیرینه اؤزل عنایت گؤستریب، بو مولک و باغلاری آلیب، توریستی بیر یئره چئویرسینلر. بئلهلیکله هم اقتصادی باخیمدان، هم کولتور باخیمیندان هم ده تاریخیمیزین قورونوب ساخلاندیغی باخیمدان دهیرلی بیر ایش گؤرولموش اولار.
