GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, Atom Enerjisi Üzrə Beynəlxalq Agentliyin direktoru Rafael Qrossi İranın uranı zənginləşdirmək imkanlarının Amerikanın nüvə anlaşmasından çıxmasından sonra daha da gücləndiyini deyib.
Qrossi aprelin 27-dəki açıqlamasında, habelə bildirib ki, təmsil etdiyi agentlik hələ də İrandan üç mərkəzdə uranın zənginləşdirilməsi ilə bağlı qalan suallara aydın cavablar almağa çalışır.
Son dörd il ərzində Atom Enerjisi üzrə Beynəlxalq Agentlik bir neçə açıqlanmayan nüvə mərkəzində tapılan uranın mənşəyi ilə bağlı İranı hesabat verməyə çağırsa da, Tehran hələ də dəqiq izahat verməyib.
Agentliyin müfəttişləri indiyədək İranda üç “şübhəli” nüvə obyekti müəyyən ediblər, onlardan biri Tehran ətrafındakı Turquzabadda, digəri isə İsfahanda yerləşir. Hər ikisi, çox güman ki, 2003 və 2004-cü illərdə uranın izlərini yox etmək məqsədilə sökülüb.
