GADTB Güney Azərbaycan Demokratik Türk Birliyi
GADTB: İran İslam Respublikasının və Ermənistanın müdafiə nazirləri Tehranda keçirilən görüşdə iki ölkə arasında hərbi və müdafiə sahəsində əməkdaşlığın genişləndirilməsinin vacibliyini vurğulayıblar.
Ermənistanın müdafiə naziri Suren Papikyanın Tehrana səfəri çərçivəsində, o, çərşənbə axşamı səhər saatlarında İranın müdafiə və silahlı qüvvələrə dəstək naziri Əmir Əziz Nəsirzadə tərəfindən rəsmi şəkildə qarşılanıb.
Görüş zamanı tərəflər müdafiə sahəsi daxil olmaqla müxtəlif istiqamətlər üzrə ikitərəfli əməkdaşlıq məsələlərini müzakirə ediblər. İranın müdafiə naziri bildirib ki, İran İslam Respublikası ilə Ermənistan arasında müdafiə əlaqələri inkişaf mərhələsindədir və hərbi-müdafiə əməkdaşlığı bundan sonra da davam etdiriləcək. O, həmçinin bu sahədə əlaqələrin tarixi keçmişinə toxunub.
Tehranla İrəvan arasında hərbi əməkdaşlığın genişlənməsi fonunda, son illərdə İranın Qarabağ müharibələri zamanı Ermənistana logistik və siyasi dəstək göstərməsi ilə bağlı çoxsaylı məlumatlar yayılıb. Bildirilir ki, İran Ermənistanın ərazisi və imkanlarından Azərbaycana qarşı təzyiq və zərbə vasitəsi kimi istifadə edib və bu yanaşma regiondakı münasibətlərdə gərginlik yaradan əsas amillərdən biri olaraq qalır.
Qeyd edilib ki, son illərdə İran və Ermənistan müxtəlif siyasi, iqtisadi və təhlükəsizlik sahələrində münasibətlərini möhkəmləndirib və müdafiə danışıqları bu strateji qarşılıqlı əlaqələrin vacib hissəsi hesab olunur.
