GADTB-nin Mətbuat Mərkəzinin “Azad İran”a istinadən yaydığı məlumata görə, Suriya dövlət telekanalı bu gün, dekabrın 7-də İsrailin Latakiya limanına hava hücumu etdiyini və bu hücumun yanğınla nəticələndiyini, lakin yanğınsöndürənlər tərəfindən alovun nəzarətə alındığını deyib.
Telegram kanalı xəbər verir ki, Suriyanın İsrailə aid etdiyi bu hava hücumu Suriya xarici işlər naziri Feysəl Meqdadın Tehrana iki günlük rəsmi səfəri ilə eyni vaxta təsadüf edib.
Suriya telekanalı İsrailin güman olunan hücumu nəticəsində insan itkisinin olub-olmaması barədə məlumat verməyib, yalnız İsrail ordusunun Latakiya limanında konteynerlərin yerləşdiyi ərazini hədəf aldığını bildirib.
Məlumatın yayılmasından saatlar sonra Londonda yerləşən Suriya İnsan Haqları Müşahidə Qrupu məlumat yayaraq qeyd edib ki, bu hava hücumunun məqsədi İranın konteynerlərdə yerləşən silah yükünə zərbə endirmək olub.
Sözügedən təşkilatın məlumatına görə, İsrail İranın silah yüklərini “birbaşa” hədəfə alıb və onları məhv edib.