GADTB Güney Azərbaycan Demokratik Türk Birliyi
GADTB: Təbriz Tibb Elmləri Universitetinin müəllimi, mama-ginekoloq doktor Şəmsi Abbasəlizadə son etirazlar zamanı molla rejimin qüvvələri tərəfindən ağır şəkildə döyülərək beyin travması alıb, daha sonra isə naməlum yerə aparılaraq saxlanılıb.
Bu məlumatı azərbaycanlı hüquq müdafiəçisi və vəkil Qasım Bodi sosial şəbəkə X hesabında paylaşıb. Bildirilir ki, doktor Abbasəlizadə 2021-ci il etirazları zamanı da saxlanılmış, Aylər Həqqinin öldürülməsinə etiraz olaraq tələbə aksiyalarında iştirak etdikdən sonra isə bütün tədris və müalicə fəaliyyətlərindən uzaqlaşdırılmışdı.
Həmin dövrdə Təbrizin Əz-Zəhra xəstəxanasında klinik tələbələr və bir neçə müəllim 9 azər 1401-ci il tarixində onun ədalətsiz şəkildə vəzifədən kənarlaşdırılmasına etiraz olaraq tətil və etiraz aksiyası keçirmişdilər.
Yayımlanan məlumatlara görə, doktor Abbasəlizadə peşəkar həyatını tam şəkildə universitet və xəstəxanaya həsr etmiş, şəxsi maraqlardan uzaq, sırf tədris və müalicə işi ilə məşğul olmuşdur. Hazırda isə onun saxlanıldığı yer və səhhətinin vəziyyəti barədə heç bir rəsmi məlumat yoxdur.
Bu hadisə son günlər Təbrizdə və ümumilikdə Azərbaycanda həkimlərə, akademiklərə və etirazçı ziyalılara qarşı artan təhlükəsizlik təzyiqlərinin daha bir nümunəsi kimi qiymətləndirilir.
