GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, Kanadada mühacirətdə yaşayan tanınmış azərbaycanlı yazıçı və şair Rza Bərahəni vəfat edib.
Bu barədə yazıçının oğlu Oktay Bərahəni sosial şəbəkələrdə məlumat paylaşıb.
Oktay Bərahəni atasının uzun sürən xəstəlikdən sonra dünyasını dəyişdiyini bildirb.
Güney Azərbaycanın Yazıçılar Birliyinin üzvü olan Rza Bərahəni, senzura və söz azadlığına qarşı qoyulan qadağalara etiraz etdiyi üçün Pəhləvi və molla rejiminin təzyiqləri ilə qarşılaşmışdı.
Bərahəni xatirələrində hələ Pəhləvi rejimi dövründən Azərbaycan türkcəsinə görə təzyiqlərlə qarşılaşdığını xatırladaraq yazırdı: “6 yaşımda birinci sinifdə oxuduğum vaxt türkcə inşa yazdığım üçün müəllim inşa yazdığı vərəqi zorla mənə yedirdi”.
Çox sayda şer, roman müəllifi olan Rza Bərahəni daha çox “Razhaye sərzəmine mən” (Yurdumun sırları) romanı ilə dünyada məşhurlaşıb.
Təbriz şəhərindən olan azərbaycanlı yazıçı uzun müddət idi Kanadada mühacirətdə yaşayırdı. O bir müddət idi müxtəlif xəstəliklərdən əziyyət çəkdiyi üçün xəstəxanaya yerləşdirilmişdi və 86 yaşında dünyasını dəyişib.
