GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, Türkmənistan Prezidenti Qurbanqulu Berdimuhammedov 2021-ci ilin noyabrında İstanbulda keçirilməsi planlaşdırılan Türk Dövlətlərin Əməkdaşlıq Şurasının (Türk Şurası) 8-ci Zirvəsinə qatılacağını təsdiqləyib.
Qurbanqulu Berdimuhammedov Türkmənistana səfər edən Türk Şurasının baş katibi Bağdad Amreyevi qəbul edib.
Qəbulda çıxış edən Berdimuhammedov ölkəsini Türk dünyası ailəsinin ayrılmaz bir üzvü olaraq gördüyünü və illərdir Türk dövlətləri ilə qardaşlıq münasibətlərini davam etdirdiklərini söyləyib.
Berdimuhammedov Türkmənistanın Türk Şurasının ortaq maraqlarına dair layihələrində iştirak etməyə hazır olduğunu bildirib və Türk dünyasında artan sürətin yaxın illərdə də davam edəcəyinə ümidvar olduğunu qeyd edib.
Türk Şurasına üzv ölkələrin prezidentləri ilə son təmaslarından bəhs edən Berdimuhammedov 2021-ci ilin noyabrında İstanbulda keçirilməsi planlaşdırılan zirvə görüşündə iştirak edəcəyini bildirib.
Türk Şurası Baş katibi Amreyev də Türk Şurasının 8. Zirvəsi üçün davam edən hazırlıqlar barədə məlumat verib və Berdimuhammedovun bu toplantıya qatılmasının Türk dünyasındakı birliyi nümayiş etdirəcəyini vurğulayıb.
