GADTB Güney Azərbaycan Demokratik Türk Birliyi
GADTB: Bu gün Türkiyə Prezident Administrasiyasının Kommunikasiya İdarəsinin direktoru Bürhanəddin Duran “X” hesabında İrandan atılan ballistik raketlə bağlı hadisədən sonra açıqlama verib.
O, Ankaranın vəziyyəti yaxından izlədiyini və artıq lazımi təhlükəsizlik tədbirlərini həyata keçirdiyini vurğulayıb. O, dövlət qurumlarının tam koordinasiyalı şəkildə hərəkət etdiyini və Türkiyənin hava məkanını və sərhədlərini qorumaq imkanlarının “ən yüksək səviyyədə” olduğunu bildirib.
Duran bütün tərəfləri, xüsusən də İranı regional təhlükəsizliyə və mülki əhalinin təhlükəsizliyinə təhlükə yarada biləcək hərəkətlərdən çəkinməyə çağırıb. O, münaqişənin daha da şiddətlənməsinin və genişlənməsinin qarşısını almağın vacib olduğunu qeyd edib.
Qeyd edək ki, Bu gün Türkiyə Müdafiə Nazirliyi İrandan buraxılan ballistik raketin Türkiyənın hava məkanında zərərsizləşdirildiyini açıqlayıb.
Bir neçə qəlpə Qaziantepdəki boş əraziyə düşüb. Xəsarət alan olmayıb.
Nazirliyin açıqlamasında mehriban qonşuluq münasibətlərinin və regional sabitliyin qorunmasının vacibliyi vurğulanıb.
Ankara xəbərdarlıq edib ki, ölkənin ərazi bütövlüyü və hava məkanının təhlükəsizliyi təhdid altında qalarsa, onu qorumaq üçün bütün lazımi tədbirlər görüləcək.
