Ərdəbildə daha iki həlak olan etirazçının şəxsiyyəti müəyyən edilib

GADTB: Daha iki nəfərin şəxsiyyəti təsdiqləndikdən sonra, indiyədək Ərdəbildə molla rejimin qüvvələrinin açdığı atəş nəticəsində həyatını itirən 4 etirazçının kimliyi məlum olub. Həlak olanlar bunlardır: Əşkan Qolami (19 yaş), Əşkan Şəhbazi (20 yaş), Mobin Əslani (19 yaş) və Əli Şirməhəmmədi (40 yaş).

Bundan əlavə, Əlirza Qulizadə (28 yaş) — Ərdəbil vilayətinin Givi bölgəsinin Zaviye Zərrəcabad kənd sakini — Tehran şəhərində keçirilən etirazlar zamanı İran rejiminin qüvvələri tərəfindən öldürülüb. Onun nəşi iki gün əvvəl ailəsi tərəfindən doğulduğu kənddə dəfn edilib.

Etibarlı mənbələrin məlumatına görə, bu şəhərdə keçirilən etirazlar zamanı “onlarla” insan həlak olub, yüzlərlə nəfər isə yaralanıb.

Həmçinin bildirilir ki, Ərdəbildə son günlərdə baş verən etirazlar zamanı “onlarla” etirazçının hər iki gözü güllə yaralanması nəticəsində tamamilə zədələnərək funksiyasını itirib. Bir çox hallarda isə etirazçıların bir gözü tibbi müdaxilə ilə müalicə olunub.

Bu məlumatlar Ərdəbildə etirazların ağır insan itkiləri və ciddi fiziki xəsarətlərlə müşayiət olunduğunu göstərir.