İran İraqda ərəb ölkələrinə qarşı hücumlar üçün yeni gizli terrorçu qrup yaradıb

GADTB: Reuters agentliyinin İraqın hərbi və təhlükəsizlik mənbələrinə istinadən yaydığı məlumata görə, İranın İslam İnqilabı Keşikçiləri Korpusu (SEPAH) İranın bölgədəki müttəfiq silahlı qruplarına qarşı artan təzyiqləri aşmaq məqsədilə İraqda birbaşa özünə tabe olan yeni gizli qruplar təşkil edib.

İraqın hərbi və təhlükəsizlik qurumlarından olan səkkiz mənbə, eləcə də şiə silahlı qruplarının bəzi komandirləri bildiriblər ki, son aylarda SEPAH İraqda tanınmış silahlı təşkilatların strukturundan kənarda fəaliyyət göstərən və birbaşa Tehrandan göstəriş alan bir neçə gizli hüceyrə yaradıb.

Məlumata görə, bu qruplar aprelin 20-dən mayın 17-dək Bəsrə və Səmavə ətrafındakı səhra bölgələrindən Küveyt, Səudiyyə Ərəbistanı və Birləşmiş Ərəb Əmirliklərindəki hədəflərə qarşı ən azı yeddi pilotsuz uçuş aparatı hücumu həyata keçiriblər.

İraq mənbələrinin bildirdiyinə görə, hücumların hədəflərindən biri Küveytdə yerləşən və ABŞ hərbçilərinin istifadə etdiyi Əli əs-Salim Hərbi Hava Bazası olub.

Reuters yazır ki, bu gizli qrupların üzvlərinin əksəriyyəti əvvəllər İraq İslam Müqaviməti adlı silahlı koalisiyanın tərkibində fəaliyyət göstərib. Lakin hazırda onlar tanınmış təşkilatların komanda zəncirindən kənarda fəaliyyət göstərirlər. Mənbələrin fikrincə, bu üsul İranın hücumlarla bağlı birbaşa məsuliyyəti rədd etməsinə və eyni zamanda regional təsirini qoruyub saxlamasına imkan verir.

Hesabatda qeyd olunur ki, HƏMAS, Hizbullah və Tehranla müttəfiq olan digər qrupların zəifləməsindən sonra İran bölgədəki strategiyasını dəyişməyə başlayıb. Bildirilir ki, SEPAH əvvəlki geniş və bahalı şəbəkələr əvəzinə daha kiçik, daha gizli və ideoloji baxımdan daha bağlı qruplara üstünlük verir.

Reuters həmçinin xəbər verir ki, İraqın yeni baş naziri Əli əz-Zeydinin rəhbərlik etdiyi hökumət ABŞ-ın təzyiqi altında dövlət nəzarətindən kənarda fəaliyyət göstərən silahlı qrupların tərksilah edilməsi planını həyata keçirməyə çalışır.

İraq rəsmiləri ölkə ərazisindən Körfəz ölkələrinə qarşı həyata keçirilən hücumları pisləyərək, Küveyt, Səudiyyə Ərəbistanı və Birləşmiş Ərəb Əmirlikləri ilə birgə araşdırmalar aparılacağını bildiriblər.

İran İslam Respublikası Reuters-in hesabatında yer alan iddialara hələlik rəsmi münasibət bildirməyib. Bununla belə, İran rəsmiləri daha əvvəl Tehranın “müqavimət qrupları” adlandırdığı təşkilatlara verdiyi dəstəyin müzakirə mövzusu olmadığını və İranla ABŞ arasında əldə edilən son razılaşmada bu məsələnin yer almadığını vurğulamışdılar.