GADTB Güney Azərbaycan Demokratik Türk Birliyi
GADTB: ABŞ Maliyyə Nazirliyi oktyabrın 8-i, cümə axşamı günü İranla bağlı bir sıra şəxsləri, qurumları və gəmiləri sanksiyalar siyahısına əlavə edib.
ABŞ Maliyyə Nazirliyinin bəyanatına əsasən, İranın “kölgə donanması” ilə əməkdaşlıq etməkdə şübhəli bilinən 22 gəmi və neft tankeri İranın “iqtisadi təcridi” əməliyyatı çərçivəsində sanksiyalar siyahısına daxil edilib.
Bu gəmilərdən üç neft tankeri Honduras, üç gəmi Panama, üç gəmi Komor adaları, iki gəmi Qambiya, iki neft tankeri Kamerun bayrağı altında üzür. Digər doqquz gəmi isə Honkonq və ya Çin, Monqolustan, Baham adaları, Syerra-Leone, Palau, Vanuatu, Tanzaniya, San-Marino və Barbados bayraqları altında fəaliyyət göstərir.
Bundan əlavə, Hindistanın beş və Əfqanıstanda doğulmuş Türkiyə vətəndaşı olan bir nəfər, İranda qeydiyyatdan keçmiş “Padide-ye Plastik Poştiban” şirkəti, eləcə də Birləşmiş Ərəb Əmirlikləri, Türkiyə, Hindistan, Böyük Britaniya, Marşall adaları, Vircin adaları, Honkonq və Çində qeydiyyatdan keçmiş şirkətlər ABŞ-ın sanksiyalar siyahısına əlavə edilib. Bu şirkətlərin əksəriyyəti dəniz nəqliyyatının idarə edilməsi və ya kimya sənayesi sahələrində fəaliyyət göstərir.
“İqtisadi təcrid” kampaniyası Tehranın xarici valyuta gəlirlərinə çıxışını kəsmək məqsədilə həyata keçirilir. ABŞ hökumətinin bildirdiyinə görə, bu gəlirlər “müharibəyə, raket istehsalına, kiberhücumlara və SEPAH-a sərf olunur”.
ABŞ Maliyyə Nazirliyinin rəsmisi Röyters agentliyinə telefonla verdiyi müsahibədə bildirib: “Bugünkü tədbir kölgə donanmasının böyük hissəsini sıradan çıxarmaqla İranın qanunsuz dəniz ticarətinin qalıq infrastrukturuna ən ağır zərbəni vurdu və bununla da rejimi sonuncu əsas qanunsuz gəlir mənbəyindən məhrum etdi”.
ABŞ Maliyyə Nazirliyinin cümə axşamı həyata keçirdiyi bu tədbir İranın neft satışları sektoruna təzyiqi daha da artırır. Təxminən üç ay əvvəl ölkəyə qarşı dəniz blokadasının yenidən tətbiq olunmasından bəri Tehran ciddi iqtisadi çətinliklərlə üzləşib.
ABŞ rəsmilərindən birinin sözlərinə görə, İranın hazırda dənizdə və ABŞ-ın blokada zonasından kənarda cəmi təxminən 20 milyon barel xam nefti var. Halbuki dünyada gündəlik neft istehlakı təxminən 100 milyon barel təşkil edir.
ABŞ son bir ay yarımdır ki, hər həftə İranla əlaqəli şəxsləri, qurumları, şirkətləri və gəmiləri sanksiyalara məruz qoyur. Vaşinqton eyni zamanda digər ölkələrə xəbərdarlıq edir ki, Tehranla istənilən əməkdaşlıq onlara qarşı ikinci dərəcəli sanksiyaların tətbiqinə səbəb ola bilər.
