İran “saxta jurnalistlər” şəbəkəsi ilə 100-ə yaxın saxta məqalə yaymış

GADTB: OpenAI şirkəti İran mənşəli bir şəbəkəni aşkarlayaraq blokladığını açıqlayıb. Şəbəkə yeddi saxta jurnalist kimliyindən istifadə etməklə dünyanın müxtəlif bölgələrində fəaliyyət göstərən təxminən 12 onlayn media orqanında 100-ə yaxın məqalə dərc etmiş və ya yenidən yayımlamışdı.

OpenAI-nin “saxta imzalar” adlandırdığı bu şəbəkə məqalələri redaktə etmək, redaktorlar üçün təkliflər hazırlamaq, sosial şəbəkələrdə paylaşılacaq rəylər yaratmaq və daxili hesabatlar tərtib etmək üçün ChatGPT-dən istifadə edirdi. Aşkarlanmış hesablar İran ərazisindən fəaliyyət göstərirdi və olduqları yeri gizlətmək üçün virtual özəl şəbəkələrdən (VPN) yararlanırdılar.

Hazırlanan məzmunun böyük hissəsi ABŞ ilə İran arasındakı müharibəyə həsr olunmuşdu. Bəzi sorğularda modeldən ABŞ-ın “təcavüzkar”, İsrailin “etibarsız müttəfiq”, İranın isə “müqavimət göstərən qurban” kimi təqdim edilməsi istənilmişdi.

Şəbəkənin fəaliyyəti sosial şəbəkələrdəki şərhlər bölməsində geniş əks-səda doğurmasa da, saxta kimliklərdən istifadə edən şəxslər məqalələrini real media orqanlarında dərc etdirməyə nail olmuşdular.

OpenAI vurğulayıb ki, bu əməliyyatın arxasında duran konkret şəxsi və ya qurumu müəyyənləşdirməyib. Şirkətin qiymətləndirməsinə görə, bu fəaliyyətlər sifariş əsasında həyata keçirilən kommersiya xarakterli təsir kampaniyasına uyğun gəlir.