GADTB Güney Azərbaycan Demokratik Türk Birliyi
ABŞ Prezidenti Donald Trampın administrasiyasının yüksək vəzifəli rəsmiləri “The New York Times” qəzetinə bildiriblər ki, Tramp İranın nüvə proqramına hücum da daxil olmaqla geniş hərbi variantları nəzərdən keçirir.
Məlumata görə, bu variantlar sırasında İranın ballistik raket imkanlarının hədəf alınması da var. Rəsmilər qeyd ediblər ki, müzakirə olunan ssenarilər yalnız hava zərbələri ilə məhdudlaşmır.
Qəzetin yazdığına görə, Tramp həmçinin ABŞ-nin xüsusi təyinatlı qüvvələrinin hərbi hədəflərə yönəlmiş əməliyyatlar üçün göndərilməsini də əhatə edən variantları masada saxlayır.
Eyni zamanda “Reuters” agentliyi iki ABŞ rəsmisinə istinadən xəbər verir ki, ABŞ ordusu İrana qarşı həftələrlə davam edə biləcək davamlı hərbi əməliyyat ehtimalına hazırlaşır. Məlumata görə, Donald Trampın göstərişi ilə bu ssenari iki ölkə arasında əvvəlki qarşıdurmalardan daha geniş və ciddi münaqişəyə çevrilə bilər.
Məsələnin həssaslığı səbəbilə anonimlik şərti ilə danışan rəsmilər bildiriblər ki, hərbi planlaşdırma Vaşinqton və Tehran arasında paralel şəkildə davam edən diplomatik səylərlə yanaşı aparılır. Onların fikrincə, bu vəziyyət hər iki tərəf üçün riskləri əhəmiyyətli dərəcədə artırır.
Məlumatda qeyd olunur ki, ötən həftə ABŞ və İran diplomatları Omanda görüşərək, ABŞ-nin regionda hərbi mövcudluğunun artması və Trampın sərt ritorikası fonunda İranın nüvə proqramı ilə bağlı danışıqların bərpasını müzakirə ediblər./Azad İran
