GADTB Güney Azərbaycan Demokratik Türk Birliyi
GADTB: Pakistanın Baş naziri Şahbaz Şərif şənbə günü bildirib ki, Tehran və Vaşinqton anlaşma memorandumunun yekun mətni üzərində razılığa gəliblər.
İran və ABŞ arasında vasitəçilik rolunu oynadığını deyən pakistanlı hökumət başçısının sözlərinə görə, sənəd yaxın 24 saat ərzində elektron formada imzalanacaq.
Şərif əlavə edib ki, memorandum imzalandıqdan sonra tərəflər cari həftə ərzində, həftəsonu tətilindən sonra, texniki danışıqlara başlayacaqlar.
İran İslam Respublikasının xarici işlər naziri Abbas Araqçı bundan əvvəl televiziya müsahibəsində bildirmişdi ki, saziş layihəsi yekunlaşdıqdan sonra imzalanma mərasimi üzbəüz deyil, məsafədən və elektron qaydada keçiriləcək.
Araqçı bu açıqlamanı, ABŞ Prezidenti Donald Trump cümə axşamı imzalanma mərasiminin ehtimal ki, Avropa ölkələrindən birində və ABŞ vitse-prezidenti C.D Vənsin iştirakı ilə baş tuta biləcəyini söylədikdən sonra vermişdi.
Məlumata görə, tərəflər arasında razılaşmanın imzalanmasından sonra nüvə proqramı, regional təhlükəsizlik və qarşılıqlı öhdəliklərlə bağlı texniki detalları əhatə edən danışıqlar mərhələsinə keçilməsi nəzərdə tutulur.
