GADTB Güney Azərbaycan Demokratik Türk Birliyi
GADTB: Şərqi Azərbaycan Regional Su Şirkətinin baş direktoru və Urmiya Gölünün Bərpası Qərargahının üzvü Yusif Qəffarzadə bildirib ki, Urmiya gölündə suyun səviyyəsi 1271 metr 13 santimetrə çatıb. Onun sözlərinə görə, bu göstərici ötən ilin eyni dövrü ilə müqayisədə 87 santimetr yüksəkdir.
Yusif Qəffarzadə qeyd edib ki, son aylarda yağan münasib yağıntılar nəticəsində gölün su səviyyəsi cari su ilinin başlanğıcı ilə müqayisədə 163 santimetrdən çox artıb.
Onun verdiyi məlumata əsasən, hazırda Urmiya gölünün sahəsi 3160 kvadrat kilometrə çatıb ki, bu da ötən illə müqayisədə 2670 kvadrat kilometrdən çox artım deməkdir.
Həmçinin göldəki suyun həcminin 4,2 milyard kubmetrə çatdığı bildirilir. Bu göstərici son illərdə qeydə alınmış ən yüksək rəqəmlərdən biri hesab olunur.
Azərbaycanın ən mühüm təbii ekosistemlərindən biri olan Urmiya gölü 1370-ci illərin sonlarından etibarən quruma prosesinə daxil olub və son onilliklər ərzində öz sahəsinin böyük hissəsini itirib.
Azərbaycandakı siyasi, ekoloji və vətəndaş cəmiyyəti fəalları uzun illərdir ki, hökumətin su siyasətini, çoxsaylı bəndlərin tikilməsini, suyun başqa bölgələrə yönəldilməsini və su ehtiyatlarının səmərəsiz idarə olunmasını Urmiya gölündə yaranmış böhranın əsas səbəbləri kimi göstərirlər.
Urmiya gölünün müdafiəsi məqsədilə keçirilən etiraz aksiyalarının bir çoxunda siyasi, vətəndaş və ətraf mühit fəallarının saxlanıldığı və təhlükəsizlik orqanlarının müdaxiləsi ilə üzləşdiyi də bildirilir.
