“Nyu-York Tayms”: Tramp İranla razılaşma üçün irəli sürülən şərtləri sərtləşdirib

GADTB: “Nyu-York Tayms” qəzetinin yaydığı məlumata görə, ABŞ Prezidenti Donald Tramp İranla müharibənin başa çatdırılması məqsədilə hazırlanan razılaşma layihəsinin şərtlərini daha da sərtləşdirib və yenilənmiş mətn baxılması üçün Tehrana göndərilib.

Məlumatlı mənbələrin bildirdiyinə görə, dəyişikliklərin bir hissəsi İranın dondurulmuş maliyyə vəsaitlərinin azad edilməsinin necə həyata keçiriləcəyi ilə bağlı Trampın narahatlıqları ilə əlaqədardır.

Hesabatda həmçinin qeyd olunur ki, Tramp İran tərəfinin ABŞ təkliflərinə cavab vermə prosesinin uzanmasından narazıdır.

Məlumata əsasən, tərəflər arasında razılaşmanın əldə olunması hələ də mümkün hesab edilir və onlar yekun sazişə yaxın olsalar da, Trampın yeni tələbləri danışıqların növbəti mərhələsinin başlanmasına səbəb olub. Bu məsləhətləşmələrin bir neçə gün də davam edə biləcəyi bildirilir.

ABŞ rəsmiləri Ağ Evin yaxın günlərdə yekun razılaşmanın əldə olunacağına ümid etdiyini vurğulayıblar.

“Nyu-York Tayms” yazır ki, yenilənmiş mətn baxılması və qərar verilməsi üçün Müctəba Xameneiyə təqdim olunub. Bununla belə, sənəddə edilən dəyişikliklərin konkret məzmunu hələ açıqlanmayıb.