GADTB Güney Azərbaycan Demokratik Türk Birliyi
GADTB: Azərbaycanlı sənədli film rejissoru və müstəqil jurnalist Məhəmməd Əlimuradi yaydığı video ilə Sayınqala (Şahindej) şəhərində Çillə Gecəsi mərasiminin keçirildiyi məkanın möhürlənməsini ictimailəşdirib və bununla da İran rejiminin Azərbaycan türk millətinin mədəni kimliyinə qarşı repressiv siyasətinin davam etdiyini diqqətə çatdırıb.
Bu məqsədli siyasətlərin davamı olaraq, İran İslam Respublikasının asayiş qüvvələri 29 azər 1404-cü il axşamı Çillə Gecəsi mərasiminin keçirilməsi üçün nəzərdə tutulan “Yağış Kitab Kafesi”ni möhürləyiblər. Bu addım, tamamilə mədəni və qeyri-siyasi xarakter daşıyan bir mərasimə qarşı hakimiyyətin təhlükəsizlik yanaşmasının növbəti nümunəsi kimi qiymətləndirilir.
Çillə Gecəsi siyasi aksiya deyil, əsrlər boyu nəsildən-nəslə ötürülən, Azərbaycan türk xalqının tarixi, mədəni və milli irsinin ayrılmaz hissəsi olan qədim bir xalq ayinidir. Buna baxmayaraq, İran rejimi Azərbaycan türklərinə məxsus dil, kimlik və mədəniyyətin ən sadə təzahürlərinə belə dözümsüz yanaşır, hər bir milli simvola qarşı düşmən və repressiv mövqe sərgiləyir.
Mərasimin keçirildiyi məkanın möhürlənməsi mədəniyyətin təhlükəsizlik predmeti halına gətirilməsinin və Azərbaycanın milli kimliyinin sistemli şəkildə sıradan çıxarılmasına yönəlmiş siyasətin açıq göstəricisidir. Bu siyasət gücdən deyil, əksinə, hakimiyyətin xalqın mədəni şüurundan, həmrəyliyindən və mədəni davamlılığından duyduğu dərin qorxudan qaynaqlanır.
Baş verənlər bir daha sübut edir ki, İran rejimi sülhpərvər və köklü xalq mərasimlərindən belə çəkinir və Azərbaycan türk xalqının milli kimliyinin hər hansı təzahürünü susdurmaq yolunda mədəni repressiyadan çəkinmir.
Video: Məhəmməd Əlimuradi
