GADTB Güney Azərbaycan Demokratik Türk Birliyi
GADTB: İran hakimiyyəti törətdiyi cinayətlərin beynəlxalq ictimaiyyətdə ifşa olunmasının qarşısını almaq məqsədilə ölkədə tam və fasiləsiz olaraq internet kəsib.
Bəzi media fəallarının yaydığı məlumatlara əsasən, İran hökumətinin sözçüsü Fatimə Mühacirani qeyri-rəsmi şəkildə bildirib ki, İranda beynəlxalq internetə çıxış ən azı 1405-ci il Novruz bayramınadək bərpa olunmayacaq.
Bu açıqlamalar fonunda qeyd olunur ki, İranda ümumi və tam internet kəsintisi artıq ikinci həftəsinə daxil olub və vətəndaşların qlobal internet şəbəkəsinə çıxışı tamamilə bloklanıb. Məlumatlı mənbələrin bildirdiyinə görə, İslam Respublikası 1404-cü il ümumölkə etirazlarında həlak olanların qırx mərasimləri başa çatmamış internetin bərpasını planlaşdırmır.
Eyni zamanda, alternativ internetə çıxış yollarının qarşısının alınması məqsədilə təhlükəsizlik tədbirlərinin gücləndirildiyi barədə də məlumatlar yayılıb. Rəqəmsal hüquqlar və vətəndaş azadlıqları sahəsində fəaliyyət göstərən “Filtrban” qurumu cümə axşamı açıqlayıb ki, hakimiyyət strukturları “Starlink” peyk internet terminallarının aşkarlanması və bloklanmasına xüsusi diqqət yetirir.
Müşahidəçilərin fikrincə, internetin uzunmüddətli kəsilməsi İran hakimiyyətinin etirazlar zamanı törədilən zorakılıq və insan hüquqları pozuntularını gizlətmək strategiyasının tərkib hissəsidir və bu addım ölkədə informasiya azadlığının faktiki olaraq tamamilə ləğv edildiyini göstərir.
