GADTB Güney Azərbaycan Demokratik Türk Birliyi
GADTB: Böyük Britaniya hökuməti İran İslam İnqilabı Keşikçiləri Korpusunu (SEPAH), o cümlədən onun “Qüds Qüvvələri” bölməsini rəsmi şəkildə terror təşkilatları siyahısına daxil edib. Bu qərar Londonun İran İslam Respublikası ilə bağlı siyasətində yeni mərhələnin başlanğıcı kimi qiymətləndirilir.
Qərara əsasən, Böyük Britaniyada SEPAH-a üzv olmaq, ona dəstək vermək və ya onun xeyrinə fəaliyyət göstərmək cinayət əməli hesab olunacaq. Qanunu pozan şəxslər həbs və maliyyə cərimələri ilə üzləşə bilərlər. Həmçinin SEPAH-ın simvollarını daşımaq və ya bu quruma dəstək kimi qiymətləndirilə biləcək tədbirlərdə iştirak etmək də hüquqi təqibə səbəb ola bilər.
Bu addım Böyük Britaniya parlamentinin üzvləri və ölkənin təhlükəsizlik qurumları tərəfindən illərlə davam edən çağırışlardan sonra atılıb. Britaniya rəsmiləri daha əvvəl İran İslam Respublikası ilə əlaqəli olduğu bildirilən 20-dən çox potensial təhdid və sui-qəsd planının ölkə ərazisində qarşısının alındığını açıqlamışdılar.
SEPAH bundan əvvəl də Böyük Britaniyanın sanksiyalarına tam şəkildə məruz qalmışdı. Lakin Londonun müxtəlif hökumətləri hüquqi və siyasi mülahizələri nəzərə alaraq bu qurumu rəsmi olaraq terror təşkilatı elan etməkdən çəkinirdilər.
