Molla rejimi ABŞ hücumları ehtimalının artması fonunda regionun müsəlman ölkələrini hədələdi

GADTB: İran Silahlı Qüvvələrinin Xatəmül-Ənbiya Mərkəzi Qərargahının komandanı Əli Abdullahi ABŞ-ın İranla qarşıdurmanı “artan sürətlə” genişləndirdiyini iddia edib.

İSNA agentliyinin məlumatına görə, Abdullahi bunu “təhlükəli strategiyanın nəticəsi” adlandıraraq region ölkələrinə sərt xəbərdarlıq edib.

Əli Abdullahi bildirib:

“Açıq şəkildə bəyan edirik ki, müsəlman ölkələri ABŞ-la əməkdaşlıq və onu dəstəkləmək məsələsinə yenidən baxmalıdırlar. Əks halda, ABŞ üçün müdafiə sipərinə çevrilən hər bir ölkə müharibə alovunda yanacaq.”

Bu açıqlamalar İranın son dövrlərdə regionda, o cümlədən İordaniya istiqamətində pilotsuz uçuş aparatları və raket hücumlarını davam etdirməsi, həmçinin İranın dəstəklədiyi husilərin strateji əhəmiyyət daşıyan Babul-Məndəb boğazı ilə bağlı təhdidlərini artırdığı bir vaxta təsadüf edir. Bu vəziyyət region ölkələrində narahatlığın daha da artmasına səbəb olub.

Səudiyyə Ərəbistanı isə Babul-Məndəb boğazında gəmiçiliyin təhlükəsizliyini təmin etmək məqsədilə 14 ölkənin iştirakı ilə beynəlxalq dəniz koalisiyasının yaradıldığını açıqlayıb.