GADTB Güney Azərbaycan Demokratik Türk Birliyi
GADTB: “Nyu-York Tayms” qəzeti Qərb təhlükəsizlik rəsmisinin qəzetə təqdim etdiyi bildirilən məxfi məlumatlara əsasən yazıb ki, İran hər həftə ictimaiyyətdən gizli şəkildə Hörmüz boğazında ticarət gəmilərinə doğru onlarla pilotsuz uçuş aparatı (PUA) və raket buraxır və onların əksəriyyəti hədəfləri vurmaqda uğursuz olub.
Qəzetin oktyabrın 2-də dərc etdiyi məlumata görə, İran avqustdan etibarən Hörmüz boğazından keçən ticarət gəmilərinə qarşı həftədə təxminən 30 PUA hücumu və 10 gəmiəleyhinə raket hücumu həyata keçirib.
Adı açıqlanmayan təhlükəsizlik rəsmisinin sözlərinə görə, son 10 gün ərzində ən azı dörd ticarət gəmisi İranın hücumlarına məruz qalıb.
Bundan əvvəl, çərşənbə günü İran İnqilab Keşikçiləri Korpusunun sözçüsü İran dövlət televiziyasına açıqlamasında deyib: “Uzun müddətdir ki, keçmək istəyən kiçik gəmiləri vurur və onların keçməsinə mane oluruq, lakin Amerika bir müddətdir buna cavab vermir.”
Hüseyn Mühebbi həmçinin vurğulayıb ki, “Hörmüz boğazında hər 24 saatdan bir hərbi qarşıdurma baş verir”.
Böyük Britaniyanın Dəniz Ticarəti Əməliyyatları Mərkəzi bildirib ki, sentyabrın 10-dan etibarən Hörmüz boğazında ən azı 13 gəmi, onların əksəriyyəti neft tankerləri olmaqla, “mərmilərin” hücumuna məruz qalıb.
Hörmüz boğazında gəmilərə hücumlar ABŞ rəsmilərinin açıqlamaları və qlobal gəmiçilik sahəsini izləyən qurumların hesabatlarının son həftələrdə bu həyati əhəmiyyətli su yolundan neft daşımalarının artdığını göstərdiyi bir vaxtda davam edir. ABŞ və İranın hər ikisi Hörmüz boğazına nəzarət etdiyini iddia edir.
“Nyu-York Tayms” yazıb ki, Hörmüz boğazından keçən gəmilər mümkün hücumların qarşısını almaq üçün ABŞ qırıcı təyyarələri və hücum helikopterlərinin dəstəyi ilə ABŞ Hərbi Dəniz Qüvvələrinin nəzarəti altında olan Oman ərazi sularındakı marşrutlardan istifadə edirlər.
Bununla belə, qəzet analitiklərə istinadən qeyd edib ki, ABŞ tərəfindən hərbi mühafizənin təmin edilməsi böyük resurslar tələb edir və bu fəaliyyətin qeyri-məhdud müddət ərzində davam etdirilməsi çətin olacaq.
