GADTB Güney Azərbaycan Demokratik Türk Birliyi
GADTB: Corc Buş administrasiyası dövründə Ağ Evin keçmiş sözçüsü Ari Fleyşer ABŞ prezidenti Donald Trampın müavini Cey Di Vensin İran İslam Respublikası ilə müharibəni Respublikaçıların seçkilərdə məğlubiyyətinin səbəbi kimi göstərən açıqlamalarına münasibət bildirib. O, əsas problemin müharibənin başlanması deyil, yekun qələbəyə nail olmağa mane olan atəşkəsin elan edilməsi olduğunu vurğulayıb.
Fleyşer hərbi əməliyyatların dayandırılmasını tənqid edərək ABŞ-ın İran İslam Respublikası rejimini devirmək, nüvə təhlükəsinə son qoymaq və daha sülhsevər Yaxın Şərq yaratmaq üçün tarixi fürsəti əldən verdiyini bildirib.
Fleyşerin fikrincə, hərbi əməliyyatlar rejim süquta uğrayanadək davam etdirilsəydi, hazırda ABŞ hərbçiləri vətənə qayıtmış, Hörmüz boğazı açılmış və benzinin bir qallonunun qiyməti 3 dollardan aşağı düşmüş olardı.
Ağ Evin keçmiş sözçüsü Ari Fleyşer bildirib: “Cənab vitse-prezident, icazə verin, fərqli bir baxış bucağını ifadə edim.
Problem İran İslam Respublikası ilə müharibə deyildi, problem atəşkəs idi.
Əgər müharibəyə başlayırsınızsa, onda qalib gəlməli və onu sona çatdırmalısınız. Əks halda, ümumiyyətlə, müharibəyə başlamamalısınız.
Bu müharibə altı ay əvvəl başa çatmalı idi. Həmin vaxt Hörmüz boğazı tamamilə açıq olmalı və neft daşımaları maneəsiz davam etməli idi.
İran İslam Respublikasının rəhbərliyində ikinci və üçüncü səviyyəli şəxslər zərərsizləşdirilməli, ölkənin idarəçiliyini ələ ala biləcək Qərbyönümlü qüvvələrə dəstək verilməli idi.
Biz yeni və daha sülhsevər Yaxın Şərqin formalaşması ərəfəsində idik, lakin həlledici məqamda geri çəkildik.
Qarşımızda təkcə İran İslam Respublikasının nüvə silahı əldə etməsinin qarşısını almaq deyil, həm də dünyanın ən böyük terror dəstəkçisini aradan qaldırmaq imkanı var idi.
Lakin bunun əvəzinə atəşkəs elan etdik və bundan sonra aylarla işi sona çatdırıb-çatdırmayacağımızla bağlı qeyri-müəyyənlik içində qaldıq.
Hər gün fərqli mesajlar verilirdi və bu vəziyyət hələ də davam edir.
Müharibə başa çatıbmı? Yenidən başlayacaqmı? Heç kim bilmir.
Mövqelərdə çaşqınlıq və ziddiyyətlər var.
2025-ci ilin iyununda ABŞ müharibənin tərəfi deyildi. Bu, İsrailin İran İslam Respublikası ilə qarşıdurması idi.
Heç kim ABŞ-ı nə həmin vaxt, nə də 2026-cı ilin fevralında İran İslam Respublikasına hücum etməyə məcbur etməmişdi.
Bu, prezident Trampın qəbul etdiyi qərar idi və məncə, düzgün qərar idi.
Lakin bu qərar qəbul edildikdən sonra rejim süquta uğrayanadək əməliyyatları dayandırmamalıydıq.
Bununla belə, siz əməliyyatları davam etdirmək əvəzinə, nə davamlı olan, nə nəticə verən, nə də hər hansı problemi həll edən bir atəşkəs barədə danışıqlar apardınız. Əksinə, bizi qeyri-müəyyən vəziyyətdə qoydunuz: qiymətlər artdı, hərbi qüvvələrimiz isə hələ də regionda yerləşdirilmiş vəziyyətdə qaldı.
Hərbçilərimiz artıq vətənə qayıda, donanmamız öz bazalarına dönə, sülhpərvər bir rejim hakimiyyətə gələ, yeni ittifaqlar yarana və benzinin bir qallonunun qiyməti 3 dollardan aşağı düşə bilərdi.
Xeyr, cənab vitse-prezident!
Problem müharibə deyil, problem məhz həmin qondarma atəşkəsdir.”
