GADTB Güney Azərbaycan Demokratik Türk Birliyi
GADTB: İran futbolunun Premyer Liqasının keçmiş hakimi Əli Səfayi etiraf edib ki, Hakimlər Komitəsinin üzvləri ona Azərbaycanın Traktor komandasının rəqibinin xeyrinə hakimlik etməyi tapşırıblar.
Səfayinin sözlərinə görə, Traktorun oyunlarından birindən əvvəl ondan Premyer Liqada qalmaq uğrunda mübarizə aparan rəqib komandanın xeyrinə fit çalması istənilib.
O, liqanın son turlarında baş vermiş şübhəli telefon danışığından da bəhs edib. Hakimin bildirdiyinə görə, Traktorun aşağı liqaya düşmək təhlükəsi ilə üzləşən cənub komandalarından biri ilə oyunundan əvvəl Hakimlər Komitəsinin məsul şəxsləri onunla əlaqə saxlayaraq rəqib komandaya dəstək verməsini istəyiblər.
Səfayi bildirib ki, həmin oyunu idarə etməkdən imtina etmək istədikdən sonra növbəti mövsümdə ona hakimlik üçün dəvət göndərilməyəcəyi ilə hədələnib.
Keçmiş hakimin bu etirafı İran futbolunda hakimliyin şəffaflığı və oyunların nəticələrinə mümkün müdaxilələrlə bağlı ciddi sualları yenidən gündəmə gətirib.
