GADTB Güney Azərbaycan Demokratik Türk Birliyi
GADTB: Yoaxim Klement, Penmor Liberum investisiya institutunun investisiya strateqi hesab edir ki, hazırda İranla bağlı müharibədə müşahidə olunan fasilə davamlı sülhün göstəricisi olmaqdan daha çox, ABŞ-da keçiriləcək aralıq seçkiləri ərəfəsindəki siyasi hesablamalarla bağlıdır. Onun fikrincə, seçkilərdən sonra İran və ABŞ arasında yenidən qarşıdurma ehtimalı arta bilər.
Yoaxim Klement Reuters agentliyinin iyulun 1-də dərc etdiyi analitik yazısında qeyd edib ki, İran noyabr ayında keçiriləcək ABŞ Konqresinə aralıq seçkilərinədək qlobal enerji bazarına təsir göstərmək imkanını qoruyacaq, lakin bu üstünlük seçkilərdən sonra zəifləyə bilər.
Onun sözlərinə görə, Hörmüz boğazının yenidən açılması və neft daşımalarının bərpası nəticəsində xam neftin qiyməti müharibədən əvvəlki səviyyəyə yaxınlaşıb. Bununla belə, Tehran və Vaşinqton arasında danışıqların uğursuzluqla nəticələnməsi enerji tədarükü ilə bağlı riskləri yenidən artıra və hətta Hörmüz boğazı bağlanmasa belə, neft və benzinin qiymətlərinin yüksəlməsinə səbəb ola bilər.
Analitik enerji qiymətlərinin artmasının müharibə dövründə Donald Trampın ictimai dəstəyinin azalmasına təsir etdiyini vurğulayaraq bildirib ki, ABŞ administrasiyası seçkilərədək gərginliyi artırmaqda maraqlı görünmür. Lakin seçkilərdən sonra siyasi vəziyyət dəyişə bilər.
Klementin fikrincə, əgər Respublikaçılar aralıq seçkilərdə yerlərinin bir hissəsini itirsələr, Donald Tramp xarici siyasətdə siyasi uğur qazanmaq üçün daha sərt addımlar atmağa meyilli ola bilər. O əlavə edib ki, payızadək İran və ABŞ arasında yekun razılaşma əldə olunmasa və tərəflər arasında nüvə proqramı ilə bağlı fikir ayrılıqları davam etsə, hərbi təzyiqlərin yenidən artması ehtimalı yüksələcək.
Analitik sonda xüsusilə Avropa və Asiyanın əsas enerji idxalçısı olan ölkələrə gələcək böhranlar qarşısında həssaslığı azaltmaq üçün idxal olunan qalıq yanacaqlardan asılılığı azaltmağı, bərpa olunan və nüvə enerjisinə investisiyaları artırmağı tövsiyə edib.
