Almaniya və Britaniya öz vətəndaşlarını İranı tərk etməyə çağırdı

GADTB: Almaniya və Britaniya İrana səyahətlə bağlı xəbərdarlıq ediblər. Onlar öz vətəndaşlarını bu ölkəyə səfər etməməyə və orada olanları isə İranı dərhal tərk etməyə çağırıb.

Dünən Almaniya Xarici İşlər Nazirliyi açıqlamasında “Avropanın tətik mexanizmini işə salmaq qərarı” fonunda bütün alman vətəndaşlarına İranı dərhal tərk etməyi tövsiyə edib.

Alman vətəndaşlarına uçuşların ləğvi riskini nəzərə alaraq, ölkəni tez bir zamanda tərk etmələri və XİN-nin xüsusi siyahısında qeydiyyatdan keçmələri tövsiyə edilib.

Eyni gün Britaniya Xarici İşlər Nazirliyi də öz vətəndaşlarına İrana səfər etməməklə bağlı xəbərdarlığını yeniləyib. Nazirlik bildirib ki, Britaniya və ya Britaniya-İran ikili vətəndaşları İranda həbs riski ilə üzləşə bilərlər.

Hələlik bu xəbərdarlığın hər hansı bir hücumla bağlı olub olmaması məlum deyil.