Benyamin Netanyahu: “Vəhşi” İran rəhbərləri ilə diplomatik razılaşma əldə etmək mümkün deyil

GADTB: İsrail mediasının məlumatına görə, İsrailin baş naziri Benyamin Netanyahu çərşənbə günü İran rəhbərlərini “vəhşi” adlandıraraq, onlarla diplomatik razılaşma əldə etməyin mümkün olmadığını bildirib.

Netanyahu həmçinin Vaşinqtona son səfəri zamanı ABŞ prezidenti Donald Trampla İran məsələsində diplomatiyaya müraciət imkanlarını müzakirə etdiyini, lakin İranın hazırkı rəhbərləri ilə razılaşma əldə olunacağına şübhə ilə yanaşdığını deyib.

Netanyahu daha əvvəl də İranla “heç bir anlaşmanın” mümkün olmadığını vurğulamış və vəzifədə olduğu müddətdə “heç bir halda” İranın nüvə silahına sahib olmasına imkan verməyəcəyinə söz vermişdi. O, İranın nüvə silahına yiyələnməsinin qarşısını almağı özünün “müqəddəs məqsədi” adlandırıb.

İsrail Vaşinqtonla Tehran arasında birbaşa və dolayı danışıqlara dəfələrlə qarşı çıxıb. Netanyahu iyul ayında da İsrailin ABŞ və İran arasında əldə ediləcək hər hansı razılaşmanın “tərəfi olmayacağını” bildirmişdi.