GADTB-nin Mətbuat Mərkəzinin rejimin “Fars” Xəbər Agentliyinə istinadən yaydığı məlumata görə, Zəncanda rejimin Sarullah Heyətinin Şəhid Müntəziri Beynəlxalq bölməsinin rəisi Əlirza Məhəmmədi bu barədə açıqlama verib. O deyib ki, Zəncanda həmin yas mərasimi höcətülislam şeyx Tohid Bayilinin çıxışı ilə keçiriləcək.
O qeyd edib ki, Sarullah Heyətinin Şəhid Müntəziri Beynəlxalq bölməsi müxtəlif şöbələrdən təşkil edilir. Şöbələrdən biri şəhid Seyid Abbas Musəvi adlanır və heyətin mübarizə bölməsi hesab edilir.
Həmin məlumata əsasən, adı çəkilən müəssisə Nardaranda İrana bağlı şəxslərin Azərbaycana qarşı əməllərini himayə edərək, Nardaranın Azərbaycan hüquq mühafizə orqanları tərəfindən mühasirə edilməsini Fələstində Qəznənin mühasirəsindən daha pis hərəkət hesab edir və bu məsələni İslam aləminin dərdi kimi qələmə verir.